Thaburi 114

Rwĩmbo rwa Bathaka

1Rĩrĩa Isiraeli moimire bũrũri wa Misiri,

nyũmba ya Jakubu ĩkiuma kũrĩ andũ a rũthiomi rũngĩ-rĩ,

2Juda gwatuĩkire handũ ha Ngai haamũre,

na Isiraeli gũgĩtuĩka nĩkuo arĩathanaga.

3Iria rĩonire ũguo rĩkĩũra,

naruo Rũũĩ rwa Jorodani rũgĩcooka na thuutha;

4Irĩma igĩtũhatũũha ta ndũrũme,

natuo tũrĩma tũgĩtũhatũũha ta tũgondu.

5Kaĩ wonire atĩa, wee iria, nĩguo ũre,

nawe Jorodani, tondũ wacookire na thuutha?

6Inyuĩ irĩma, muonete kĩ, nĩguo mũtũhatũũhe ta ndũrũme,

na inyuĩ tũrĩma, nĩguo mũtũhatũũhe ta tũgondu?

7Wee thĩ, ta kĩinaine ũrĩ mbere ya Mwathani,

ũrĩ hau mbere ya Ngai ũcio wa Jakubu,

8o we ũcio wagarũrire rwaro rwa ihiga rũgĩtuĩka karia ka maaĩ,

narĩo ihiga rĩũmũ rĩgĩtuĩka ithima cia maaĩ.