Thaburi 112

Irathimo cia Andũ arĩa Athingu

1Goocai Jehova.

Kũrathimwo nĩ mũndũ ũrĩa wĩtigagĩra Jehova,

ũrĩa ũkenagĩra maathani make mũno.

2Ciana ciake nĩigatuĩka cia bata bũrũri-inĩ;

rũciaro rwa arĩa arũngĩrĩru nĩrũkarathimwo.

3Gwake mũciĩ gũkoragwo na ũtonga na indo nyingĩ,

naguo ũthingu wake ũtũũraga nginya tene.

4Mũndũ ũrĩa mũrũngĩrĩru o na arĩ nduma-inĩ nĩatheragĩrwo nĩ ũtheri,

ũgatherera mũndũ ũcio mũtugani, ningĩ arĩ tha, o na nĩ mũthingu.

5Mũndũ ũcio mũtugani na ũheanaga o ũguo tũhũ,

o ũcio wĩkaga maũndũ make na kĩhooto-rĩ, nĩarĩonaga maũndũ mega.

6Ti-itherũ mũndũ ũcio ndakenyenyeka;

mũndũ mũthingu atũũraga aririkanagwo nginya tene.

7Angĩigua ũhoro mũũru ndangĩĩtigĩra;

ngoro yake nĩĩkindĩire, aikaraga ehokete o Jehova.

8Ngoro yake nĩngitĩre, ndangĩĩtigĩra;

marigĩrĩrio-inĩ nĩakoona gũtoorio gwa thũ ciake.

9Nĩahurunjĩte iheo ciake akahe andũ arĩa athĩĩni,

naguo ũthingu wake ũtũũraga nginya tene;

rũhĩa rwake nĩrũkambarario na igũrũ, aheo gĩtĩĩo.

10Mũndũ ũrĩa mwaganu nĩakoona ũguo na arakare,

nĩakahagarania magego make, acooke abuĩrie;

merirĩria ma arĩa aaganu matigaakinyanĩra.