Mika 5

Mũthamaki kuuma Bethilehemu

1Thagathaga mbũtũ ciaku cia mbaara,

wee itũũra inene rĩa mbũtũ cia mbaara,

nĩgũkorwo matũrigiicĩirie matũũkĩrĩre.

Nĩmakaringa mwathi wa Isiraeli

rũthĩa-inĩ na rũthanju.

2“No rĩrĩ, wee Bethilehemu Efiratha,

o na harĩa arĩ we mũnini mũno mĩhĩrĩga-inĩ ya Juda,

thĩinĩ waku nĩkuo gũkoima

ũrĩa ũgaatuĩka mwathi wa Isiraeli,

ũrĩa kĩhumo gĩake nĩ gĩa kuuma tene,

kuuma mĩndĩ na mĩndĩ.”

3Tondũ ũcio, Isiraeli nĩagatiganĩrio

nginya ihinda rĩkinye,

rĩrĩa ũrĩa ũraarũmwo agaaciara,

nao ariũ-a-ithe arĩa angĩ

magaacookerera andũ a Isiraeli.

4Nĩagookĩra arĩithie rũũru rwa mbũri ciake

arĩ na hinya wa Jehova,

na ũnene wa rĩĩtwa rĩa Jehova Ngai wake.

Nao nĩmagatũũra marĩ agitĩre, nĩgũkorwo hĩndĩ ĩyo

ũnene wake ũgaakinya o nginya ituri ciothe cia thĩ.

5Nake nĩagatuĩka thayũ wao.

Ũhonokania na Mwanangĩko

Hĩndĩ ĩrĩa Ashuri makaahithũkĩra bũrũri witũ,

na matuĩkanĩrie ciĩhitho ciitũ nũmu,

nĩtũkamaarahũrĩra arĩithi mũgwanja,

o na anene anana mamokĩrĩre.

6Nĩmagaatha bũrũri wa Ashuri na rũhiũ rwa njora;

maathe bũrũri wa Nimurodi na hiũ cia njora icomoretwo.

Nĩagatũhonokia kuuma kũrĩ Aashuri

hĩndĩ ĩrĩa magaatharĩkĩra bũrũri witũ

na matuĩkanĩirie mĩhaka-inĩ iitũ.

7Matigari ma Jakubu magaatuĩka

ta ime riumĩte harĩ Jehova

gatagatĩ-inĩ ka ndũrĩrĩ nyingĩ,

o na ta mbura ya rũthuthuũ yurĩte nyeki-inĩ,

ĩrĩa ĩtarehagwo nĩ mũndũ kana ĩkoirio nĩ andũ.

8Matigari ma Jakubu magaakoragwo gatagatĩ ka ndũrĩrĩ,

o gatagatĩ ka ndũrĩrĩ nyingĩ,

ta mũrũũthi ũrĩ thĩinĩ wa nyamũ cia mũtitũ,

na ta kĩana kĩa mũrũũthi kĩrĩ thĩinĩ wa ndũũru cia ngʼondu,

kĩrĩa gĩthiiaga gĩgĩcitihangagia na gĩgĩcitambuuraga

na gũtirĩ mũndũ ũngĩcihonokia.

9Guoko gwaku nĩgũkambarario na igũrũ kuonanie ũhootani harĩ thũ ciaku,

na amuku aku othe nĩmakaniinwo.

10Jehova ekuuga atĩrĩ, “Mũthenya ũcio-rĩ,

“nĩngananga mbarathi ciaku ikweherere biũ,

nacio ngaari ciaku cia ita ndĩcitharie.

11Nĩngananga matũũra marĩa manene ma bũrũri wanyu,

na tharũrie ciĩhitho iria nũmu cianyu ciothe.

12Nĩngananga ũgo wanyu,

na mũtigacooka kũragũra rĩngĩ.

13Nĩngananga mĩhianano yanyu ya gwacũhio,

na nyanange mahiga manyu marĩa maamũre mũrĩ namo;

mũtigacooka kũinamĩrĩra

wĩra wa moko manyu rĩngĩ.

14Itugĩ cia Ashera iria mũrĩ nacio nĩngacimunya

na momore matũũra manyu manene.

15Nĩngerĩhĩria ndĩ na marakara na mangʼũrĩ

kũrĩ ndũrĩrĩ iria itanjathĩkagĩra.”