Isaia 12

Nyĩmbo cia Kũgooca

1Na rĩrĩ, mũthenya ũcio nĩũkoiga atĩrĩ,

“Nĩngũkũgooca, Wee Jehova.

O na gũtuĩka nĩwaandakarĩire-rĩ,

nĩũnjehereirie marakara maku na ũkaahooreria.

2Ti-itherũ Mũrungu nĩwe ũhonokio wakwa;

nĩwe ndĩrĩĩhokaga na ndigage gwĩtigĩra.

Jehova, o we Jehova, nĩwe hinya wakwa na rwĩmbo rwakwa;

nĩatuĩkĩte ũhonokio wakwa.”

3Mũrĩtahaga maaĩ ithima-inĩ cia ũhonokio mũkenete.

4Mũthenya ũcio nĩmũkoiga atĩrĩ:

“Cookeriai Jehova ngaatho, kaĩrai rĩĩtwa rĩake;

menyithaniai ndũrĩrĩ-inĩ ũrĩa ekĩte,

na mũhunjie muuge atĩ rĩĩtwa rĩake nĩ itũũgĩrie mũno.

5Inĩrai Jehova, nĩgũkorwo nĩekĩte maũndũ marĩ riiri;

na mũtũme ũndũ ũcio ũmenywo nĩ thĩ yothe.

6Anĩrĩrai mũine mũrĩ na gĩkeno, inyuĩ andũ a Zayuni,

nĩgũkorwo Ũrĩa Mũtheru wa Isiraeli, o ũcio ũrĩ gatagatĩ-inĩ kanyu, nĩ mũnene mũno.”