Siiqo Saba 3

Geela7oya

1«Omars kumeth ta hiixan ichchada,

ta siiqoza demmanaas amottadis;

minththadakka koyadis;

gido attiin demmanaas

dandayabeekke.

2Katama giddon diza ogetaninne

dubbushata ubbaan yuuyadis;

ta siiqoza demmanaas amottadis;

minththadakka koyadis;

gido attiin

demmanaas dandayabeekke.

3Katama yuuyi naagizayti

tana demmida;

tani isttas,

‹Ta siiqoza beyidetii?›

gaada oychchadis.

4Isttafe guuth aadhdha baada

ta siiqoza demmadis;

izi taappe kessi ekkontta mala

minththada oykkadis;

ta aayey keeth ekka efadis;

ta yelettida kifile gelththadis.

5Intteno Yerusalaame geela7otoo!

Siiqozi baas dosidi

dendana gakkanaas,

iza intte beegoththontta mala,

tani inttena genessataninne

bazzo Wushatan amatays» gadus.

Laggeti

6«Karbbefe, exaaneppenne

zal7anchchata

sawoppe giigettida shitto mala

sawo tunnu gashenne

cuwa mala tullu gashe

bazzora yizaara

hanna iza oonee?

7Hekko be7ite, Solomoone

para-gaareya yuussan dawus;

Isra7eeleppe doorettida

usuppun tammu ola asati

izo azhabida.

8Istti ubbayka

mashsha oyth meezetida,

ola erizaytanne

omars yiza meto eqettanaas

issoy issoy

mashsha gixxida mala aqeettes.

9Kawo Solomooney

para-gaare giddon

uttiza araatay

Libaanoose miththafe oosettides.

10Iza araata tuussati

biran tiyettida;

zemppozi worqqan alleqettides;

uttizaasozi ochcha teera misatiza

qacinappe oosettides;

giddoza Yerusalaame

geela7oti siiqos

dadida afalan aleqissida» gida.

Geela7oya

11«Intteno Xiyoone geela7otoo!

Izi keehi ufayettida

iza bullachcha gallas

iza aaya iza hu7en woththida

kallachcha goxxi

uttidayssa be7anaas

Kawo Solomoonekko

haa yiite» gadus.