Geeshsha Mexaafa
Mazamure Maxaafa 146
Ashshiza Xoossas Shiiqida Galata
GODAY galatetto!
Ta shemppoyee,
GODAA galata!
Ta de7o layththa ubbaan
tani GODAA galatana;
tani shemppora paxa diza wode
ubbaan ta Xoossa sabbana.
Dere ayssizaytan ammanettofte;
As ashshanawu dandayontta
asho may7ida
medhetatan ceeqettofte.
Istta shemppoy keziza wode
istti biittan simmana;
istta halchchoy ubbay
he gallas attana.
Yaaqoobe Xoossay maaddiza asi
ba hidotakka ba GODAA bolla
woththida asi anjjettidaade.
GODAY salonne sa7a,
gita abbanne istta
giddon diza ubbaa
medhdhidayssa;
izi ba ammaneteththaa
mernaas naagizayssa.1
Izi qohettidaytas pirdizayssa;
gafidayta mizi kalssizayssa.
GODAY qashettidayta
birshi yeddizayssa;
GODAY qooqeta xeelisees.
GODAY kundidayta denththees;
GODAY xillotakka siiqees.
GODAY bete asata naagees.
Am7etanne yi7o nayta maaddees;
gido attiin iitata oge dhayssees.
GODAY mernaas kawo;
Xiyoone! Ne Xoossi
yeletappe yeleta gakkanaas
kawotana.
GODAY galatetto!
Source notes (1)
- Cross-reference Hawa 4:24; 14:15
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.