Geeshsha Mexaafa
Mazamure Maxaafa 140
Dawiti Zammareta Kaabbos Yexxida Mazamure
Abeet GODAWU!
Iita asatappe tana ashsha;
makkallanchchatappeka
tana naaga.
Istti ubba wode
iita ooththanaas maqetteettes;
ubba gallassika
oosh denththanaas
yo7o piqqeettes.
Istti haso shooshsha mala
inxars qaraseettes;
istta doonappe goppe marze mala
qaalay kezees.1
Abeet GODAWU!
iita asata kusheppe tana ashsha;
ta toho qaxxanaas qoppiza
makkallanchchatappeka
tana naaga.
Otoranchchati taas
woximade woththida;
gite giigsida;
ta ogenkka diiza woththida.
Tani GODAA,
«Neni ta Xoossa» gays.
Abeet GODAWU!
Tani shoobbizayssa siya.
Abeet Ubbaafe Wolqqama GODAWU!
tana ashshiza minozoo!
ola gallas taas gondalle gidadasa!
Abeet GODAWU!
Iitata amoy polettofo;
istta qofay
polettana mala ooththofa!
Ta morkketan tana xoonisoppa;
istti qoppida iita qofay
istta hu7en xaaxetto.
Istta bolla tama bonqoy qoletto;
istti taman olettetto;
simmi kezanaas dandayontta
ollan kundetto.
Iita haasayzayta biittay tookkofo;
makkallanchchata
iita miishshi oykko.
GODAY hiyeesatas pirdizayssanne
metotanchchatas
mootettizayssa ta erays.
Xilloti tumuppe
ne sunththaa galatana;
suuretikka ne sinththan de7ana.
Source notes (1)
- Cross-reference Oro 3:13
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.