Leemiso Maxaafa 4

Aadho Erateththa Go7a

1Ta naytoo! Intte aawa zore siyite;

wozinan woththi ezgite;

akeekakka inttes miish histtite.

2Tani inttes lo7o timirte

immiza gishshas

ta timirte aggofte.

3Tani ta hu7enkka

ta aawaas yelaga naa;

ta aayeyska mexi issi naa.

4Ta aaway tana tamaarsishe,

«Ta qaala kumeththa

wozinan oykka;

ta azazotakka naaga;

ne histtiko paxa de7ana.

5Aadho erateththinne akeeka oykka;

ta qaala dogoppa;

izippeka kare kezoppa.

6Aadho erateth aggofa;

iza nees gondalle gidana;

izo siiqa;

izakka nena naagana.

7Aadho erateththi bayra;

hessa gishshas izo demma.

Akeekay ne aqoza ubbaa

ekkizaa gidikkoka iza demma.

8Neni aadho erateth bonchcha;

iza nena

dhoqqu dhoqqu ooththana;

neni izo idimma;

iza nena bonchchana.

9Iza ne hu7en

saba akilile woththana;

bonchcho kallachchaka

immana» gees.

10Ta naazoo! Ta gizayssa ezga;

ta qaalaakka

ne wozinan woththa;

ne layththi aduqqana.

11Tani nena aadho erateththa

oge kaaleththana;

suure ogekka bessana.

12Ne hemettashe dhuphettaka;

woxxikokka kundaka.

13Ta timirte lo7eththa oykka;

izo yeddofa;

iza nees de7o gidida gishshas

izo naaga.

14Nagaranchchata oge yedhdhofa;

iita asata ogenkka hemettofa.

15Izippe haakka; izin hemettofa;

izippe guye simma;

histtada ne ogeyra ba.

16Istti iita ooththontta dishe

dhiski erettenna;

as dhupheththontta dishin

dhiskoy istta ayfen yeenna.

17Istti iitateth kaththa mala meettes;

genekka ushsha mala uyeettes.

18Xillota ogey seeta gallas gakkanaas

poo7i poo7i biza

mallado xalqqe mala.

19Gido attiin nagaranchchata ogey

sakkanna dhuma mala;

istti aazan dhuphettanaakkoka

erettenna.

20Ta naazoo! Ta gizayssa akeeka;

ta qaalaakka lo7eththa ezga.

21Ne ayfe sinththafe haassofa;

ne wozinan woththa.

22Gaasoykka istti demmiza asas

de7o immeettes;

istti asateththaska

payyateth immeettes.

23Ubbaafekka bollara

neni ne wozina

minththada naaga;

ays giikko de7oy izappe pulttees.

24Ne doonappe gene haasaya digga;

iita haasaya

ne metershafe haassa.

25Ne ayfeti sitti giidi

sinth xeelletto;

tishshi histtada

ne sinththan dizayssa xeella.

26Ne tohos oge giigsa;

suure oge xalla hemetta.1

27Ushach hadirsi gooppa;

ne toho iitappe naaga.