Geeshsha Mexaafa
Isayaasa Tinbite 21
Baabiloone Bolla Yootettida Tinbite
Abba lanqen diza bazzo biittas yootettida GODAA qaalay hayssafe kaallizayssa.
Dugeha baggafe gote carkoy
pitti ekki yiza mala
worajjizay shiro denththeththiza
bazzo biittafe yees.
Yashshiza ajjuuta ta be7adis;
aaththi immizayssi
aaththi immees;
di7izayssi di7ees.
Elaame denda!
Meedoone giddoththa!
iza gaththida waaye ubbaa
ta essana.
Hessa gishshas ta xeessay
sako xalala gidides;
miixay oykkida maccassa mala
tana leessoy oykkides;
tani siyida yo7oy
tana gadigadissides;
ta be7ida yo7on shirotadis.
Ta wozinay poddu gides;
tana yashshi kokkorisides;
ta ufayssan naagida omarsay
ta bolla hirga yeggides.
Istti maadda giigsida;
uttizaso giigsida;
midanne uyida.
Intteno shuumetoo dendite!
gondalleza zayten quccite!
GODAY tana,
«Ba; wochchiza as woththa;
izi ba be7idayssa yooto.
Paran gooshettiza
para-gaareta be7iza wode
hare toggizayta
gaamella toggizayta
be7iza wode izi yuushshi qoppo;
lo7eththi wochcho» gides.
Naagizayssika waassishe,
«Godawu, tani gallas gallas
pacey baynda
shakko bolla eqqadis;
omars ubbaan
ta naagizasohon eqqadis.
Be7ite, issi asi paratan
gooshettiza para-gaaretan yides;
histtidi, ‹Baabilooney
kundadus! Kundadus!
izi eeqa xoossa misletikka
meqeretti gaden kundida›
gi zaarides» gi waassides.1
Balen bukettida ta derezoo!
Ubbaafe Wolqqama GODAA
Isra7eele Xoossafe
ta siyida qaala nees yootays.
Eedoome Bolla Yootettida Tinbite
Eedoome gishshas yootettida
mino yo7o;
issi asi Seyreppe
tana xeygidi «Naagizayssoo!
Gadey wonttanaas
ay keena saatey attidee?
Naagizayssoo! Gadey wonttanaas
ay keena saatey attidee?» gides.
Naagizayssi zaaridi, «Wonttana;
gido attiin simmidi qammana;
oychchana koykko oychchite;
gido attiin simmidi
haa yiite» gides.
Arabe Bolla Yootettida Tinbite
Arabe gishshas yootettida mino yo7o;
Intteno Dadaane zal7anchchatoo!
intte intte caana
gaamellatara Arabe bazzon aqana.
Saamettidaytas haath ehite;
intteno Temaanen dizaytoo!
Bete asatas kath ehite.
Istti giththa mashshafenne
koohoppe shodettida
giththa mashshafe,
waaxettida wondafeppenne
suullida olappe baqatida.
GODAY tana, «Konttiraate oosanchcha ooso gallassi wuriza mala issi layththa giddon Qeedaare bonchchoy ubbay wurana. Qeedaare biittan wondafen dukkiza wolqqama olanchchatappe guuththati attana; hessa GODAA Isra7eele Xoossay yootides» gides.
Source notes (1)
- Cross-reference Ajju 14:8; 18:2
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.