1 પિત્તરનો પત્ર 5

ટોળા ગોવાળ

1કોલ્યોહોક ઓહડયો વાતો હેય જ્યો આંય તાઅને વડીલાહાન આખા કોઅતાહાંવ, કાહાકા આંયબી તુમહે હારકો યોક આગેવાન હેતાંવ. માયે પોતે ચ્યા દુઃખહાલ દેખ્યાહા, જીં બોજ પેલ્લા ખ્રિસ્તાય વેઠયાં. જોવે તો પાછો ફિરી યેઅરી, તોવે આંયબી ચ્યા મહિમામાય ભાગીદાર ઓઅહીં. 2આમી આંય તુમહાન વિનાંતી કોઅતાહાંવ, કા વિસ્વાસ્યાહા ચ્યા ટોળા દેખભાલ કોઆ જીં પોરમેહેરા હેય, એને જ્યેં તુમહાન દેખભાલા હાટી હોઅપી દેનલે ગીયહેં. ઈ મજબુરીથી નાંય, બાકી પોરમેહેરા ઇચ્છા પરમાણે આનંદથી કોઆ. તુમા ઈ કામ પોયહા આશાયેથી મા કોઅહા બાકી પોરમેહેર એને લોકહા સેવા કોઅના ઇચ્છાથી કોઆ. 3જ્યા લોક તુમહાન હોઅપલા ગીયહા, ચ્યા લોકહાવોય યોક ઓદિકાર્યા હારકો મા બોનહે, બાકી ચ્યાહાહાટી યોક હારો નમુનો બોન. 4કાહાકા જોવે ઈસુ ખ્રિસ્ત, જો કા આમહે મુખ્ય ગોવાળ હેય, પાછો ફિરી યેઅરી, તોવે તુમહાન યોક કોદહીજ કરમાય નાંય જાય ઓહડો મહિમાયે મુગુટ દેઅરી.

પોરમેહેરાલ હોઅપાય જાયના એને સૈતાના વિરુદ કોઅના

5યેજપરમાણે તુમા જુવાન માટડાહાંય, તુમાબી વડીલ માટડાહા આધીન રા, તુમા બોદા ને બોદા નમ્રતા થી યોકબીજા સેવા કોઆ, કાહાકા કાદો પવિત્રશાસ્ત્રમાય વાચી હોકહે, “પોરમેહેર અભિમાની લોકહા વિરુદ કોઅહે બાકી તો ચ્યા લોકહાહાટી સદા મોયા કોઅહે જ્યા વિનમ્ર હેય.” 6યાહાટી, પોતે પોતાલ પોરમેહેરા હામ્મે નમ્ર કોઆ જો રાખવાળી કોઅનામાય બળવાન હેય એટલે તો હાચ્ચે સમાયે તુમહાન બોજ રીતે માનપાન દેય. 7પોરમેહેરાલ આપહે બોદ્યો પરેશાન્યો એને ચિંતાયો આખા કાહાકા તો તુમહે કાળજી કોઅહે.

8સાવચેત ઓઆ, એને જાગતા રા, કાહાકા તુમહે દુશ્માન સૈતાન તુમહે તાપાસ કોઅતો ફિરતો રોહે એટલે તુમહે નાશ કોઅય દેય, રેકનારા સિંહી વાગા હારકો હેય, તો યા હોદમાય રોહે, કા કાલ ફાડી ખાઉં. 9મજબુત બોરહાહાતે ચ્યા સામનો કોઆ, કાહાકા તુમા જાંઅતેહે કા યા દુનિયામાય તુમહે આર્યા વિસ્વાસી યે પરમાણે દુઃખ બોગવી રીયહા.

10પોરમેહેર જો પુરીરીતેથી સદા મોયાકોય બોઆલો હેય, ચ્યાય તુમહાન ઈસુ ખ્રિસ્તાઆરે તુમહે એકતા લીદે ચ્યા અનંત મહિમાયેમાય ભાગીદાર બોનાહાટી તુમહાન હાદ્યાહા. તુમહે વાયજ વાઆ લોગુ દુઃખ વેઠયાં પાછે પોતેજ તુમહાન સિદ્ધ એને મજબુત એને બળવાન કોઅરી. 11તો કાયામહાટી સામર્થશાલી થી રાજ કોઅરી. આમેન.

છેલ્લી સલામ

12માયે ઈ વાયહાના પત્ર સિલવાનુસા મોદાતકોય લોખ્યાં એને તુમહાન દોવાડયાહા. આંય ચ્યાલ ખ્રિસ્તામાય બોરહાવાળો બાહા રુપામાય માનતાહુ. મા યાલ લોખના મોતલાબ તુમહાન ઈંમાત દેઅના એને ખાત્રી કોઆડના હેય કા જો કાયબી તુમા અનુભવ કોઅય રીયહા, તો આસલીમાય તુમહેહાટી પોરમેહેરા સદા મોયા ભાગ હેય, યે મોયામાય ટિકિ રા. 13બાબેલ શેહેરા વિસ્વાસી તુમહાન સલામ આખતેહે, જ્યાહાન પોરમેહેરે નિવડયાહા જેહેકેન ચ્યે તુમહાન નિવાડલા. માર્ક, જો માયેહાટી યોક પોહા હારકો હેય, તોબી તુમહાન સલામ આખહે. 14યોકબિજાલ આસલીમાય પ્રેમથી સલામ કોઆ, તુમા બોદહાન, જ્યા ખ્રિસ્તામાય હેતા, શાંતી મિળતી રોય.