Ekajuk Scriptures Bible Portions
Kol 4
Babnde aju, jo filen aju enyahne nob nob go mbang anyehng anyehng, wahn fere jo buumu re, n tob kpi Nde go ejahbetul Esowo.
Erehke ji Pol gohro rehke aneb ero
Belen ekakesehk go ero akake.1 Jo kunen ekpu ana ń kpꞌkake ero, wahn fere jo kak Esowo saam. Jo tob kaken ero fvfo ka-r, eji Esowo lꞌlennge mbang ka-r, e jo bung akpokosi alum nya Kraist tong ane. Tibre alum nyao nya wahnge n wob go agbekobo. Jo kaken ero, eji n lꞌjo bung go mbang nyi bahke jo lennge alum Esowo, ana fuumu re me m bung. Ń lꞌwoomo go ellong ane ba ki li aneb Esowo, jo bangen! Kana jo rannge ngare enyahne mbol mbol!2 Jo bungen yebe yebe ngare anyehng anyehng, wahn jo semme akang, eji ń lꞌmal jo faange nne awohng awohng nnooba nfaange.3
Atem Pol ba bo jo lim eltum ano
Mmonanne ejahre Tikikus ji kpo sahb kor-r kor bahk-n tongo kpee bada name. Á li nkakesehk a nlokeltum no Jehova, no kpo tob lim eltum nꞌnehm ana wahr. Ano wo wahnge n tum-e tv-n, eji á lꞌba nyehn ana ń kpꞌlimi, fere kak-n eltim.4 N tumu ye, fere tum Onesimus,5 ji li nkakesehk a mmonanne ejahre no kpo kor-r sꞌsehng, ye ji wob go egahne ellong. Bo bahk-n tongo ejum ajehng ajehng ji kpꞌlimi ga.
Aristarkus ji e wob ngbekobo ano kp-n kake nnyo.6 Ano wo fvfo Mak,7 ji li mmon a Barnabas kp-n tob kak nnyo. M ma-n tohko tong bada ne re, á lꞌba go egahne, wahn vvr-e. Jisos ji bo kpo lung-e re Justus kp-n tob kak nnyo. Ane baa ana ba li aneb Jus, ba e kpo lim eltum ano a bo, ni Jehova, a etul ebe. Bo jo kak-m eltim sehng.
Epafras ji lohng go egahne ellong kp-n tob kak nnyo.8 Á tob li nlokeltum a Jisos Kraist, no kpo buum-n go ege ero bi á kpo kono elkake ngare anyehng anyehng. Á kpo kak ero, jo nok re wahn yiimi tꞌtahne, fere gbal, jo kahn ana ḿ bahke jo toono mbang nyi Esowo, kꞌbel nfaabe anyehng anyehng. N kpo yiim-e ntianse re á jo limi eltum sehng ka-n, fere tob jo lim ka ane ba li go Laodisea, a ane ba li go Hierapolis.
Luk ji li nlimakahm no kpo kor-r sꞌsehng, ye a Demas, bo kp-n tob kak nnyo.9 Kaken abonanee ba li go Laodisea nnyo ka-m, wahn tob kak Nimfa nnyo, nnenkal no aneb ero bandiki kpo song kono go ege etahk.
Ń lꞌlung nwer nyia mal, tumen tv aneb ero ba li go Laodisea,10 bo tob lung fvfo, wahn tob lung nwer nyi aneb Laodisea bahke tumu tv-n.
Tongen Arkipus re á jo lim eltum ni Jehova m-e ka go nseenga nseenge.11
Me Pol, mefono wo kpꞌnyono nnyo mia mi n kp-n kake go egame ebo. Kana yini agbekobo enyame! Nong, nnoobo nyi Esowo jol a nahne.
Source notes (11)
- Footnote 1 Tes 5:17
- Footnote Ef 5:15-16
- Footnote Ef 4:29; Mak 9:50
- Footnote Ef 6:21-22
- Footnote Fai 10-11
- Footnote Elt 19:29; 27:2
- Footnote Elt 15:36-41; 2 Tim 4:11
- Footnote Kol 1:7-8
- Footnote 2 Tim 4:10-11; Fai 24
- Footnote Ell 3:14
- Footnote Fai 2
Ekajuk Scriptures Bible Portions. Copyright © 2024 Luke Initiative for Scripture Translation and The Seed Company. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.