Biblica® Ochiw Thuolo Motingʼo Loko Manyien™
Zaburi 3
Zaburi mar Daudi, kane oringo oa ir wuode Abisalom.
Yaye Jehova Nyasaye, mano kaka wasika thoth!
Mano kaka joma lawa ngʼeny!
Ji mangʼeny wuoyo kuoma, kagiwacho ni,
“Nyasaye ok bi rese.” Sela1
To In e okumbana mogengʼa, yaye Jehova Nyasaye;
In ema imiyo alocho, kendo isetingʼo wiya malo.
Aywak matek ka alemo ni Jehova Nyasaye,
kendo odwoka gie gode maler. Sela
Ariera piny mondo anindi;
kendo achako aa malo, nikech Jehova Nyasaye orita.
Ok abi luoro ji gana gi gana
molwora mondo otimna marach.
Aa malo, yaye Jehova Nyasaye!
Resa, yaye Nyasacha!
Tur chok lemb wasika duto;
Muk leke joma timbegi richo.
Resruok aa mana kuom Jehova Nyasaye.
Mad igweth jogi. Sela
Source notes (1)
- Footnote Sela tiend wachni ok ongʼere.
Biblica® Open New Luo Translation™ / Biblica® Ochiw Thuolo Motingʼo Loko Manyien™. Copyright © 1980, 2002, 2003, 2020 by Biblica, Inc. Used with permission. “Biblica” is a trademark registered in the United States Patent and Trademark Office by Biblica, Inc. Used with permission. Original work available for free at www.biblica.com and open.bible. CC BY-SA 4.0. Typesetting only; no intended changes to scripture wording. BibleKenya is not endorsed by Biblica.
Full source notice & licence · CC BY-SA 4.0 · SourceEdition imported 2026-10-25.