Isaya 55

Luong ne joma riyo oloyo

1“Biuru un duto ma riyo oloyo,

biuru mondo umodh pi,

adier biuru un ma uonge pesa,

mondo ungʼiew kendo uchiem!

Biuru ungʼiew divai gi chak nono maonge chudo.

2Angʼo momiyo utiyo gi pesa

kungʼiewo gik ma ok chiemo kendo utiyo matek gi luchi ne gima ok yiengʼu.

Winjuru, ee winjauru kendo ucham gima ber,

mi unubed gi mwandu mar chuny.

3Chik iti kendo ibi ira,

winj gima awacho mondo chunyi obed gi kwe.

Abiro loso singruok mosiko kod

herana mar adier mane asingone Daudi.

4To ne, asemiyo obedo janeno e kind ogendini,

kendo asekete obedo jatelo mar ogendini.

5Chutho iniluong pinjeruodhi

mane ok ingʼeyo mabi iri,

kendo pinjeruodhi mane ok ongʼeyi malongʼo nobi iri,

nikech Jehova Nyasaye ma Nyasachi,

Jal Maler mar Israel osewiri kod duongʼne.”

6Dwar Jehova Nyasaye ka pod thuolo

nitie minyalo yudego;

chutho luonge kapod en machiegni.

7Ngʼama timbene achach mondo owe yorene,

kendo ngʼama parone opongʼ gi timbe richo mondo owe.

Onego oduog ir Jehova Nyasaye,

kendo enobed gi ngʼwono kuome mi enowene richone.

8“Nimar parona ok e paroni

bende yorena ok e yoreni,”

Jehova Nyasaye owacho.

9“Mana kaka polo bor gi piny e kaka

bende yorena boyo maloyo mau,

kendo e kaka parona ohewo parou.

10Mana kaka koth gi pe lwar koa e polo,

kendo ok dog nono ka ok omiyo piny ngʼich,

ma cham twi kendo nyag kothe ne jachwoyo,

kendo cham ne jachiemo,

11e kaka wachna mawuok e dhoga,

ok noduogna nono ka ok otiyo tije,

to nyaka ochop dwarona,

kendo otiek tijno mane omiyo aore.

12Unuwuog kuno gi mor

kendo notelnu gi kwe,

gode madongo gi matindo nower matek e nyime

kendo yiende duto manie bungu nopam gi ilo.

13Kuonde ma yande pedo ema nitie,

nonyag olemo mabeyo mag yiend obudo,

kendo kar kudho ema ochwoga mamit nodongie.

Mano nomi Jehova Nyasaye huma maduongʼ,

to gi ranyisi manyaka chiengʼ ma ok nomuki.”