Isaya 12

Wende mag pak

1E kindeno iniwach niya,

“Anapaki, yaye Jehova Nyasaye.

Kata obedo ni mirima nomaki koda to mirimbino,

koro oserumo kendo isekweyo chunya.

2Kuom adiera Nyasaye e jaresna;

anagen kuome kendo ok analuor.

Jehova Nyasaye, ma en Jehova Nyasaye owuon,

e tekra kendo wenda;

kendo osebedo resruokna.”

3Gi mor malach,

ibiro tuomo pi koa e sokni mag resruok.

4E kindeno iniwach niya,

“Gone Jehova Nyasaye erokamano,

luong nyinge kendo landuru ni ji duto gik ma osetimo,

ka uhulo ni nyinge nigi duongʼ moloyo.

5Werne Jehova Nyasaye nikech osetimo gik madongo;

kendo mano nyaka ngʼere e piny duto.

6Koguru matek kuwer gi mor,

un jo-Sayun nimar Jal Maler mar Israel odak e dieru.”