ယာကုပ် 5

ချမ်းသာသောသူလို့အား သတိပေးခြင်း

1ချမ်းသာသောသူလို့၊ အခု နားထောင်ကြလော့။ နင်လို့အပေါ် သက်ရောက်မဲ့ ဒုက္ခဆင်းရဲခြင်းများအတွက် ငိုကကြလော့။ 21နင်လို့ရဲ့ စည်းစိမ်ဟ ဆွေးမြည့်ယွေ့ နင်လို့ရဲ့ အဝတ်များဟို ပိုးကိုက်စားလေပီ။ 3နင်လို့ရဲ့ ဆွေနဲ့ ငွေများဟ အချေးတက်လျက် ဆိပီ။ အဲအချေးဟလည်း နင်လို့ တဖက်နှိုက် သက်သေ ဖြစ်ယွေ့ နင်လို့အသားဟို မီးလို လောင်ကျွမ်းစေလိမ့်မယ်။ နင်လို့ဟ နောက်ဆုံးသော နေ့ရက်ကာလနှိုက် ဥစ္စာများဟို သိုမှီးထားကြလော့။ 4ကျေ့ကြလော့။ နင်လို့ လယ်ကွင်းနှိုက် ရိတ်သိမ်းပေးလဲ့ အလုပ်သမားလို့ဟို နင်လို့ ဝါယွေ့ မပေးဘဲနေသော အားခများဟ အော်ဟစ်နေကြအယ်။ ရိတ်သိမ်းသောသူလို့ရဲ့ အော်ဟစ်သံများဟလည်း ခေါန်းခင်ဗိုလ်ခြေအဆှင် ထာဝရဘုရားရဲ့ နားဟို ရောက်လေပီ။ 5နင်လို့ဟ လောကတွင် အပျော်ပါးလိုက်စားယွေ့ ဇိမ်ခံနေကြပီ။ အသတ်ခံရကြမဲ့ နေ့အတွက် မိမိလို့တတ်တိုင်း ဆူဖြိုးအောန် ကျွေးမွေးကြပီ။ 6နင်လို့ဟ ဖြောင့်မတ်သောသူဟို အပစ်ဆိတာဟု သတ်မှတ်ယွေ့ သတ်ကြပီ၊ သူဟ နင်လို့ဟို ဆီးတားခြင်း မပြု။2

သည်းခံခြင်းနဲ့ ဆုတောင်းခြင်း

7အဲကျောန့် ညီအကို မောင်နှမလို့၊ နင်လို့ဟ သခင်ဘုရား ကြွလာလဲ့တိုင်အောန် သည်းခံယွေ့ စောင့်နေကြလော့။ လယ်သမားဟ မိမိမြေမှ ဖိုးထိုက်သော အသီးနှံများ ထွက်ရန် မိုးဦးနဲ့ မိုးနှောင်း ရွာပီးလဲ့တိုင်အောန် စောင့်မျော်တတ်အယ်။ 8နင်လို့ဟလည်း သည်းခံယွေ့ စောင့်မျော်နေကြလော့။ သခင်ဘုရား ကြွလာလဲ့ နေ့ရက်ကာလဟ နီးကပ်လာပီ ဖြစ်ယွေ့ နင်လို့ရဲ့ မျော်လင့်ချက်ဟို ခိုင်မာစေကြလော့။

9ညီအကို မောင်နှမလို့၊ စစ်ကြောစီရင်ခြင်းနဲ့ ကင်းလွတ်မဲ့အကျောန်း အချင်းချင်း ငြင်းခုံပစ်တင်ခြင်းဟို မပြုကြနဲ့။ တရားစီရင်ပိုင်သောသူဟ ထင်ခါးနားမှာ ရပ်နေအယ်။ 10ညီအကို မောင်နှမလို့၊ ထာဝရဘုရားရဲ့ နာမဟို အမှီပြုယွေ့ ဟောပြောသော ပရောဖက်လို့ဟ ဆင်းရဲဒုက္ခတွေ့ခြင်း၊ သည်းခံခြင်းရဲ့ ပုံသက်သေဟို ပြကြပီဟု မှတ်ကြလော့။ 11သည်းခံနိန်သောသူလို့ဟ မင်္ဂလာဆိသူ ဟူယွေ့ ငါလို့ ခေါ်ကြအယ်။ ယောဘဟ သည်းခံကျောန်းဟို နင်လို့ ကြားရကြပီ။ ထာဝရဘုရားဟ မိမိအမှုဟို လက်စသတ်ရာမှာ ရမ်းဆာ့ ကရုဏာထားကျောန်းဟိုလည်း သိမျော်ရကြပီ။ 123

ညီအကို မောင်နှမလို့၊ အထူးသဖြင့် ကျိန်ဆိုမှုဟို မပြုကြနဲ့။ ခေါန်းခင်၊ မြေကြီးဟို တိုင်တည်ယွေ့ မကျိန်ဆိုနဲ့။ ပစာအရာဟိုမျှ တိုင်တည်ယွေ့ မကျိန်ဆိုနဲ့။ နင်လို့ဟ ဟုတ်တာဟို “ဟုတ်အယ်” မဟုတ်တာဟို “မဟုတ်ဝူး” ဟုသာ ပြောဆိုကြလော့။ အားမဟုတ်ရင် တရားစီရင်ခြင်းဟို ခံရလိမ့်မယ်။

13နင်လို့တွင် ဆင်းရဲဒုက္ခခံရသူဆိရင် သူဟ ဆုတောင်းစေ။ ဝမ်းမြောက်ရွှင်လန်းသောသူဆိရင် ချီးမွန်းသီချင်းဟို သီဆိုစေ။ 144ဖျားနာသောသူဟ အသင်းတော်အကြီးအကဲများအား ဖိတ်ခေါ်စေ။ သူလို့ဟ သခင်ဘုရားရဲ့ နာမဟို အမှီပြုယွေ့ ဆုတောင်းကြစေ။ 15ယုံကြည်ခြင်းဖြင့် ဆုတောင်းခြင်းဟ လူနာအား ကျန်းမာစေလိမ့်မယ်။ သခင်ဘုရားဟ သူ့အား ကျန်းမာလာစေယွေ့ သူပြုမိသော အပစ်များဟိုလည်း ဖြေလွှတ်လိမ့်မယ်။ 16အဲလိုမို့ နင်လို့ဟ ကျန်းမာစေခြင်းဟို ခံရမဲ့အကျောန်း တဦးနဲ့ တဦး မိမိရဲ့ အပစ်များဟို ဖော်ပြဝန်ခံလျက် အချင်းချင်းအတွက် ဆုတောင်းကြလော့။ ဖြောင့်မတ်သောသူရဲ့ စိတ်အားထက်သန်လဲ့ ဆုတောင်းချက်ဟ ရမ်းဆာ့ တန်ခိုးပါယွေ့ ထိရောက်မှု ဆိအယ်။ 17ဧလိယဟ ငါလို့လို သာမန် လူသားတဦး ဖြစ်အယ်။ သူဟ မိုးမရွာစေရန် စိတ်အားထက်သန်စွာ ဆုတောင်းသောအခါ သုံးနှစ်နဲ့ ခြောက်လတိုင်တိုင် မြေပေါ်နှိုက် မိုးမရွာဘဲ နေအယ်။ 18အဲပင်းရင် သူဟ နောက်တဖန် ဆုတောင်းသောအခါ ခေါန်းခင်မှ မိုးရွာသွန်းယွေ့ မြေဟ အသီးအနှံများဟို ဖြစ်ထွန်းစေအယ်။

19ညီအကို မောင်နှမလို့၊ နင်လို့တွင် တစုံတယောက်သောသူဟ သမ္မာတရားလမ်းမှ လွဲသွားယွေ့ တစုံတဦးဟ သူ့ဟို ပြန်လည်ခေါ်ဆောင်လာရင် 205အပစ်ဆိသောသူဟို မားယွင်းသောလမ်းမှ ပြန်စေသောသူဟ အပစ်ဆိသောသူရဲ့ စိတ်ဝိညာဉ်6ဟို သေခြင်းမှ ကယ်တင်ယွေ့ ရမ်းဆာ့သော အပစ်လို့ဟို ဖုံးအုပ်တတ်တာဟု အဲသူဟ သိမှတ်စေ။