ယာကုပ် 2

မျက်နှာမလိုက်ရန် သတိပေးခြင်း

1ငါ့ ညီအကို မောင်နှမလို့၊ ဘုန်းအသရေနဲ့ ပြေ့စုံသော ငါလို့ သခင် ယေရှု ခရစ်တော်ဟို ယုံကြည်ခြင်းအရာနှိုက် လူမျက်နှာဟို ထောက်ခြင်း မဆိကြနဲ့။ 2အကယ်ယွေ့ နင်လို့ရဲ့ စည်းဝေးရာဟို ဝင်လာသော လူနေယောက်အနက် လူတယောက်ဟ ဆွေလက်စွပ်နဲ့ ဝတ်ကောင်းစားလများဟို ဝတ်ဆင်ထားယွေ့ အခြားတယောက်ဟ ဆင်းရဲနွမ်းပါးသူ ဖြစ်သဖြင့် စုတ်ပြတ်သောအဝတ်ဟို ဝတ်ဆင်ထားအယ်။ 3နင်လို့ဟ တင့်တယ်သော အဝတ် ဝတ်ဆင်ထားသောသူဟို ဂရုစိုက်လျက် “နင်ဟ ဟေနေရာကောင်းတွင် ထိန်မန့်” ဟု ဆိုယွေ့ ဆင်းရဲသောသူအား နင်ဟ “အဲနေရာတွင် ရပ်မန့်၊ ငါရဲ့ ခြေရင်း ကြမ်းပြင်ပေါ်နှိုက် ထိန်မန့်” ဟု ဆိုရင် 4နင်လို့ဟ အချင်းချင်းကြားနှိုက် လူတန်းစား ခွဲခြားယွေ့ မကောင်းသော တွေးတောကြံစည်မှုလို့ဖြင့် တရားစီရင်သူများ ဖြစ်ကြပီ မဟုတ်လော။

5ငါ ချစ်သော ညီအကို မောင်နှမလို့၊ နားထောင်ကြလော့။ ဘုရားသခင်ဟ ဟေလောကတွင် ဆင်းရဲသောသူလို့ဟို ယုံကြည်ခြင်းနှိုက် ကြွယ်ဝသောသူအဖြစ် လည်းကောင်း၊ ကိုယ်တော်ဟို ချစ်သောသူလို့အား ကတိထားသော နိုင်ငံတော်ဟို အမွေဆက်ဆံသူအဖြစ် လည်းကောင်း ရွေးကောက်တာ မဟုတ်လော။ 6အားပေမဲ့ နင်လို့ဟ ဆင်းရဲသောသူလို့ဟို မထီမဲ့မြင် ပြုကြအယ်။ ချမ်းသာသောသူလို့ဟ နင်လို့ဟို ညှဉ်းဆဲနှိပ်စက်ကြတာ မဟုတ်လော။ သူလို့ဟ နင်လို့အား တရားရုံးဟို ဆွဲခေါ်သွားကြတာ မဟုတ်လော။ 7နင်လို့ ခံယူရဆိလဲ့ နာမတော်မြတ်ဟို ကဲ့ရဲ့ကြတာ မဟုတ်လော။

8နင်လို့ဟ ကျမ်းစာနဲ့ အညီ “ကိုယ့်အိုင်နီးချင်းဟို ကိုယ်နဲ့အမျှ ချစ်ရမယ်” ဟု မွန်မြတ်လဲ့ ပညတ်တရားဟို အမန်တကယ် စောင့်ထိန်းရင် ကောင်းသောအမှုဟို ပြုကြလေပီ။ 9အားပေမဲ့ မျက်နှာလိုက်ရင် နင်လို့ဟ အပစ်ပြုကြတာ ဖြစ်ယွေ့ ဖောက်ဖျက်ကျူးလွန်သောသူအဖြစ် ပညတ်တရားအားဖြင့် အပစ်ဖော်ပြခြင်းဟို ခံရမယ်။ 10ပစာကို့ ပညတ်တရား အလုံးစုံဟို စောင့်ထိန်းသော်လည်း တပါးဟို မားရင် ပညတ်တရား အလုံးစုံဟို ကျူးလွန်ရာ ရောက်အယ်။ 11အကျောန်းမှာ “အိုင်ထောင်ရေး ဖောက်ပြန်မှုဟို မကျူးလွန်ရ” ဟု ပညတ်သောသူဟ “လူ မသတ်ရ” ဟု ပညတ်အယ်။ အဲလိုမို့ နင်ဟ အိုင်ထောင်ရေး ဖောက်ပြန်မှုဟို မကျူးလွန်သော်လည်း လူသတ်ရင် ပညတ်တရားဟို ဖောက်ဖျက်ကျူးလွန်သူ ဖြစ်အယ်။ 12အဲကျောန့် လွတ်လပ်ခြင်းနဲ့ဆိုင်သော တရားတော်အားဖြင့် စီရင်ခြင်း ခံရမဲ့သူများလို ပြောဆိုကျင့်ကြံကြလော့။ 13ပစာကို့ သနားကရုဏာ မဆိသူသောသူဟ ကရုဏာကင်းသော တရားစီရင်ခြင်းဟို ခံရလိမ့်မယ်။ အားပေမဲ့ သနားကရုဏာဟ တရားစီရင်ခြင်းအပေါ် အောန်မြင်တတ်အယ်။

ယုံကြည်ခြင်းနဲ့ အကျင့်

14ငါ့ညီအကို မောင်နှမလို့၊ လူတစုံတယောက်ဟ ယုံကြည်အယ်ဟု ဆိုသော်လည်း အကျင့်အားဖြင့် သက်သေမပြနိန်ရင် ပစာ အကျိုးဆိမှာလုန်း။ အဲယုံကြည်ခြင်းဟ သူ့အား ကယ်တင်နိန်မှာလုန်း။ 15ညီအကို မောင်နှမလို့ဟ အဝတ်အချည်းစည်းနေလျက် နေ့စဉ် လိုအပ်သောအစားအစာလည်း မဆိသောအခါ 16နင်လို့ထဲမှ တစုံတယောက်ဟ “ငြိမ်းချမ်းစွာ သွားကြလော့။ နွေးထွေးစွာ နေယွေ့ ဝလင်စွာ စားကြလော့” ဟု သူလို့အား ဆိုလျက် သူလို့ရဲ့ ကိုယ်ခန္ဓာအတွက် လိုအပ်သောအရာများဟို မပေးဘဲနေရင် စလို အကျိုးဆိမှာလုန်း။ 17ယုံကြည်ခြင်းဟလည်း အဲတိုင်းတိုင်း ဖြစ်အယ်။ အကျင့်နဲ့ ကင်းသော ယုံကြည်ခြင်းဟ တပါးတည်းဆိသောကျောန့် အသေ ဖြစ်အယ်။

18အားပေမဲ့ “နင်နှိုက် ယုံကြည်ခြင်း ဆိယွေ့ ငါနှိုက် လုပ်ဆောင်မှု ဆိအယ်” ဟု အချို့သောသူဟ ပြောဆိုလိမ့်မယ်။ အဲလိုမို့ အကျင့်ကင်းသော နင်ရဲ့ ယုံကြည်ခြင်းဟို ငါ့အား ပြလော့။ ငါဟလည်း ငါရဲ့ အကျင့်အားဖြင့် ငါရဲ့ ယုံကြည်ခြင်းဟို နင့်အား ပြမယ်။ 19ဘုရားသခင် တဆူတည်း ဆိကျောန်းဟို နင်ဟ ယုံကြည်အယ်။ ကောင်းအယ်။ နတ်ဆိုးလို့ပင် ယုံကြည်ယွေ့ ကြောက်ရွံ့တုန်လှုပ်ကြအယ်။ 20အချင်း လူမိုက် အကျင့်ကင်းသော ယုံကြည်ခြင်းဟ အကျိုးမဆိကျောန်း1 နင် သိလိုသလော။ 21ငါလို့အဖ အာဗြဟံဟ ဘုရားသခင်နဲ့ မန်ကန်မှုဟို စလို ရဆိနိန်မှာလုန်း။ သူဟ မိမိသား ဣဇက်ဟို ပလ္လင်ပေါ်တွင် ပူဇော်သောအခါ အကျင့်အားဖြင့် ရဆိအယ်။ 22သူရဲ့ ယုံကြည်ခြင်းဟ အကျင့်နဲ့ အတူဆိနေတာဟို နင် မသိမမျော်သလော၊ အကျင့်အားဖြင့် သူရဲ့ ယုံကြည်ခြင်းဟို ပြေ့ဝစုံလင်ယွေ့ လာအယ်။ 23အဲအခါ “အာဗြဟံဟ ဘုရားသခင်ဟို ယုံကြည်သဖြင့် အဲယုံကြည်ခြင်းဟို သူရဲ့ ဖြောင့်မတ်ခြင်းအဖြစ် သတ်မှတ်အယ်” ဟူသော ကျမ်းစာချက်ဟ ပြေ့စုံခြင်းဟို ရောက်အယ်။ အာဗြဟံဟလည်း ဘုရားသခင်ရဲ့ မိတ်ဆွေဟု ခေါ်ခြင်းဟို ခံရအယ်။ 24လူဟ ယုံကြည်ခြင်းအားဖြင့်သာ ဖြောင့်မတ်ရာဟို ရောက်တာ မဟုတ်၊ အကျင့်အားဖြင့် ရောက်တာဟို နင်လို့ သိမျော်ရကြအယ်။

25အဲတိုင်းတိုင်း ပြေ့တန်ဆာ ရာခပ်ဟ ဣသရေလ သူလျှိုလို့ဟို ကြိုဆို လက်ခံပင်းနောက် အခြားသောလမ်းဖြင့် ထွက်သွားနိန်ရန် ကူညီပေးခဲ့ပင်း သူမရဲ့ အကျင့်အားဖြင့် ဖြောင့်မတ်ရာဟို ရောက်တာ မဟုတ်လော။

26အဲကျောန့် ဝိညာဉ်နဲ့ ကင်းသော ကိုယ်ခန္ဓာဟ အသေဖြစ်သလို အကျင့်နဲ့ ကင်းသော ယုံကြည်ခြင်းဟလည်း အသေဖြစ်အယ်။