ဓမ္မသစ်ကျမ်း ဓနုဘာသာစကား
ဟေဗြဲ 3
ယေရှုဟ မောရှေထက် ကြီးမြတ်အယ်
အဲလိုမို့ ခေါန်းခင်နဲ့ဆိုင်သော ခေါ်ယူခြင်းနှိုက် ပါဝင်လဲ့ သန့်ဆှင်းသူ ညီအကို မောင်နှမလို့၊ ငါလို့ ယုံကြည်ဝန်ခံလဲ့ တမန်တော်နဲ့ ယဇ်ပုရောဟိတ်မင်း တည်းဟူသော ယေရှုအကျောန်းဟို စဉ်းစားဆင်ခြင်ကြလော့။ မောရှေဟ ဘုရားသခင်ရဲ့ အိုင်တော်နှိုက် မိမိထမ်းဆောင်ရမဲ့ အလုပ်တွင် သစ္စာစောင့်သလို ယေရှုဟလည်း မိမိအား ဟေအလုပ်တာဝန်ဟို ပေးသော ဘုရားသခင်အား သစ္စာစောင့်အယ်။ အိုင်ဆောက်သူဟ အဲအိုင်ထက် သာယွေ့ ဂုဏ်အသေရေဆိသလို ယေရှုဟ မောရှေထက် သာယွေ့ မြင့်မြတ်သော ဘုန်းအသရေဟို ခံထိုက်အယ်။ အကျောန်းမှာ အိုင်တိုင်းဟို တစုံတယောက်ဟ တည်ဆောက်ရအယ်၊ အားပေမဲ့ အရာခပ်သိမ်းဟို တည်ဆောက်သောသူဟ ဘုရားသခင် ဖြစ်အယ်။ မောရှေဟ နောင်အခါ ဟောပြောမဲ့အရာလို့အတွက် သက်သေဖြစ်ရန် အစေခံအဖြစ် ဘုရားသခင်ရဲ့ အိုင်တော်တခုလုံးအပေါ် သစ္စာဆိအယ်။ ခရစ်တော်မှာ သားတော်အဖြစ် ဘုရားသခင်ရဲ့ အိုင်တော်အပေါ် သစ္စာဆိအယ်။ ငါလို့ဟ ယုံကြည်စိတ်ချခြင်းနဲ့ မျော်လင့်ခြင်းနှိုက် ဂုဏ်ယူဝါကြွားခြင်းလို့ဟို စွဲကိုင်ထားရင် ဘုရားသခင်ရဲ့ အိုင်တော် ဖြစ်အယ်။
မယုံကြည်မှုအတွက် သတိပေးခြင်း
အဲလိုမို့ သန့်ဆှင်းသော ဝိညာဉ်တော်ဟ၊
“ဘုရားသခင်ရဲ့ အသံတော်ဟို ခနေ့ ကြားရင်
တောကန္တာရတွင် စမ်းသပ်စစ်ဆေးရာ ကာလနှိုက် ဆန့်ကျင်ဘက်ပြုသလို
ခိုင်မာသော စိတ်နေလုံး မဆိကြနဲ့၊
အဲအရပ်တွင် နင်လို့ ဘိုးဘေးများဟ ငါ့ဟို စမ်းသပ်ကြကာ
အနှစ်လေးဆယ်အတွင်း ငါပြုသောအမှုများဟို တွေ့မျော်ခဲ့ကြအယ်။
အဲလိုမို့ အဲမျိုးဆက်ဟို ငါအမျက်ထွက်ပင်း
သူလို့ဟ စိတ်နေလုံးထဲနှိုက် အစဉ်လမ်းလွဲယွေ့
ငါရဲ့ လမ်းဟို မသိကြ” ဟု ငါ ဆိုအယ်။
ငါဟ အမျက်ထွက်သဖြင့်
“သူလို့ဟ ပစာအခါမျှ ငြိမ်ဝပ်ရာ ချမ်းသာဟို ခံစားရန် ပြေတော်ဟို ဝင်ကြရလိမ့်မယ် မဟုတ်” ဟု ငါ ကျိန်ဆိုခဲ့အယ်။
ညီအကို မောင်နှမလို့၊ နင်လို့တွင် မယုံကြည်တတ်သော ဆိုးညစ်လဲ့ စိတ်နေလုံး ဆိသဖြင့် အသက်ဆှင်သော ဘုရားသခင်ဆေမှ ထွက်ခွာသွားမဲ့သူ တစုံတဦးမျှ မဆိစေရန် သတိပြုကြလော့။ အားပေမဲ့ နင်လို့တွင် အပစ်ရဲ့ လှည့်စားမှုကျောန့် စသူမျှ စိတ်နေလုံး မာကျောခြင်း မဆိစေရန် ခနေ့ဟုခေါ်ရသော အချိန်ဆိနေသရွေ့ နေ့စဉ် အချင်းချင်း တိုက်တွန်းနှိုးဆော်ကြလော့။ ငါလို့ဟ အစနှိုက် ဆိသော စိတ်ချမှုဟို အဆုံးတိုင်အောန် ခိုင်မြဲစွာ စွဲကိုင်ထားရင် ခရစ်တော်နဲ့ စပ်ဆိုင်သောသူများ ဖြစ်အယ်။
ကျမ်းစာနှိုက်၊
“နင်လို့ဟ ခနေ့ ဘုရားသခင်ရဲ့ အသံဟို ကြားရရင်
နင်လို့ရဲ့ ဘိုးဘေးများဟ ဆန့်ကျင်ဘက်ပြုကြသလို
နင်လို့ စိတ်နေလုံး ခိုင်မာခြင်း မဆိကြနဲ့” ဟု ဆိုထားအယ်။
အဲလို ကြားရလျက်နဲ့ ဆန့်ကျင်ခဲ့သူများဟ စသူတုန်း။ မောရှေရဲ့ ယိုးမှုအားဖြင့် အဲဂုတ္တုပြေမှ ထွက်လာသောသူအပေါင်းလို့ပင် မဟုတ်လော။ နှစ်ပေါင်းလေးဆယ်တိုင်တိုင် ဘုရားသခင်ရဲ့ အမျက်ထွက်ခြင်းဟို ခံရသူလို့ဟ စသူတုန်း။ ဒုစရိုက်အပစ်ပြုသဖြင့် တောကန္တာရတွင် လဲယွေ့ သေဆုံးသူများ ဖြစ်အယ်။ “သူလို့ဟ ငြိမ်ဝပ်ရာ ချမ်းသာရဆိစေရန် ပြေတော်ဝင်ခွင့်ဟို ပစာအခါမျှ ငါ ပေးလိမ့်မယ် မဟုတ်” ဟု စသူလို့ဟို ရည်ညွှန်းယွေ့ ဘုရားသခင် ကျိန်ဆိုတာလုန်း၊ ကိုယ်တော်ရဲ့ စကားဟို နားမထောင်သူများဟို ရည်ညွှန်းခြင်း မဟုတ်လော။ အဲလိုမို့ သူလို့ဟ မယုံကြည်သောကျောန့် ပြေတော် မဝင်နိန်တာဟို ငါလို့ သိကြအယ်။
ဓမ္မသစ်ကျမ်း ဓနုဘာသာစကား. Copyright © The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.