Ansa 7

Udansuki adama tsugbani

1Maku ma̱va̱, reme kadanshi ka̱va̱

ka̱ta̱ kpamu vu zuwa wila̱ u va̱ a̱ ka̱ɗu ka̱ nu.

2Tono wila̱ u va̱, vi ta̱ a̱ ciya̱ wuma,

ere ku yotsongusu ku va̱ an maku ma ka̱shi ma̱ nu.

3Shiya le ekiye a̱ nu,

ɗana le a magbaganla ma̱ ka̱ɗu ma̱ nu.

4Dana ugboji a vu ɗa taku va̱,

ka̱ta̱ vu dana kpamu kuyeve kumaci ku nu,

5i ta̱ a ku ere wu ubuta̱ u tsugbani,

n ubuta̱ u vuka vu vuza yoku vu na vi n una̱ wu uyoꞋo.

6Kanna ko yoku mi a ku indana,

n tsu katusu ka kpaꞋa ka̱ va̱.

7Ɗa me enei a̱ ka̱tsuma̱ ka za a babu kusheshe,

ɗa n zukai vuza yoku a̱ ka̱tsuma̱ ko kolobo,

ka̱ɗa̱nga̱ni koyoku ka na ki babu ma̱riki.

8A̱yi nwalu a uye ugbayin ɗevu n ubuta̱ u na wi ida̱shi.

a nwalu a uye a kubana a kpaꞋa ku ni,

9n kulivi, makyan mana kanna ki a̱ kuyikpa̱,

a makyan ma na ka̱yimbi ka kayin ka̱ gita̱i.

10Ɗa u cinai ni,

u lapulai ka̱cika̱ni tsu kashakanlai o kufoɓuso tsuna u kuya̱nsa̱ yi.

11A̱yi tana vuza motonu ɗa, kpamu n ugbamiwasuvu,

makyan dem ene a̱ ni i a ida̱shi a kpaꞋa ba.

12Makyan mo yoku a uye, makyan mo yoku kpamu a̱ suvu a likuci,

ubuta̱ dem una uye u kpatalai, ta ɗe vi a kucinai.

13Ɗa woɓongi ni,

n kindi ku ugoyi ɗa u danai ni.

14<<Mi ta̱ n ka̱ɗiva̱ ka ida̱shi ma̱ta̱na̱ a kpaꞋa,

anna mi ta̱ a kushatangu uzuwakpani uva̱.

15I ɗaɗa i zuwai ɗa mu uta̱i adama ana n gasa n avu,

n ciga ta̱ me ene wu, ɗa tana me enei nu na.

16N pala ta̱ a̱ga̱da̱ a̱va̱

n arikinla a tsuzogu tsa aza Masar.

17N bufangu ɗe ili ma̱gula̱ni a̱ga̱da̱ va̱,

n muru vu ma̱gula̱ni, n alosu koɓolo n sinamon.

18Ta̱wa̱, tsu pana uyoꞋo wu ucigi, tsu panakpanai ali usana,

ta̱wa̱ tsu oɓongbonoi a̱ ka̱tsuma̱ ka maciganai.

19Vali va̱ wi punu a kpaꞋa ba,

u yaꞋan ta̱ nwalu n daꞋangi.

20U ɗika ta̱ ikebe ya a̱bunda̱i,

wi a kubono a kpaꞋa ba, sai kanna ka na wotoi u pecei.>>

21Ɗa u kondoi le n a̱guma̱ a̱ni,

n una̱ wu uyoꞋo u ni ɗa u doroi ni.

22Gogolo ɗa u tonoi ni

tsu kanaka kana a ku banka ubuta̱ u ku kiɗa,

tsu mesheun ma na mi a ka ɗikpangusu a kubana a maza.

23Ubuta̱ u na kaya ka sovoi ni ali a̱ ka̱ɗu ka̱ni,

wita̱ lo tsu manunu mana mo moloko a ku uwa a maza,

a̱yi u yeve ana n wuma u ni u ɗa u ku tsupaka ba.

24Gogo na, muku n va̱, panakai mu,

zuwai atsuvu i pana kadanshi ka̱ una̱ u va̱.

25Ka̱ta̱ yu ushuku n icuꞋu i vuka vu nanlo,

u zuwa ka̱ɗu ka̱ ɗa̱ ka cikala kuyongo kuni ba,

ka̱ ta̱ i tono uye u ni ba.

26Adama ana a̱yi ɗa wu una uma n a̱bunda̱i,

u zuwai uma n a̱bunda̱i ukpa̱

ali i kukece ba.

27KpaꞋa ku ni uye u kubana a kpaꞋa ku ukpisa̱ uɗa,

u na u gida̱la̱ a kubana a kasaun.