Ansa 29

1Vuza na baci de dem wi n ugbamukaci, ɗa u kpa̱ɗa̱i ku pana udansuki,

i ta̱ a kuɓosoyi, ali ula uteku tsu na a ku fuɗa a lapula.

2Aza usuɓi i baci a tsugono, uma a tsu pana ta̱ uyoꞋo.

Ama ɗa baci aza a gbanigbani i o tsugono, uma a tsu ka̱na̱ ta̱ mololo.

3Vuma na u ci ciga ugboji, u tsu zuwa ta̱ dada ni ma̱za̱nga̱,

ama koto ni ka ashakanlai, ka̱ tsu la̱nga̱sa̱ ta̱ udukuyan u ni.

4Mogono mu usuɓi ma tsu zuwa ta̱ iɗika i ni i gan,

ama vuza na u tsu la̱nsa̱ kalya, u tsu la̱nga̱sa̱ ta̱ i ɗika i ni.

5Vuza na u tsu yaꞋanka toku ni una̱ wu uyoꞋo,

maza ma u tsu shikpa̱ka̱ a ene e le.

6Unushi u vuza gbanigbani u tsokpo ta̱ maza wa̱ni,

ama vuza vu usuɓi u tsu laꞋaka ta̱, ka̱ta̱ worokpo n ma̱za̱nga̱.

7Vuza vu usuɓi u tsu dama ta̱ adama aza unambi,

ama, vuza gbanigbani u tsu yeve n ka nanlo ba.

8Aza a gbanigbani a tsu zuwa ta̱ likuci ra̱ka̱ i dagaza,

ama aza usuɓi a tsu vaꞋanka ta̱ uma a̱ɗu.

9Ɗa baci vuza vu ugboji u bankai kalau ubuta̱ wa afada,

ka̱ta̱ kalau ka ka̱na̱ izoshi n wupa, ka̱ta̱ kadanshi ka kpa̱ɗa̱ ku kotso.

10Aza a̱ ma̱ga̱lka̱ a ci ciga aza a babu unushi ba,

ama aza usuɓi a tsu la̱nsa̱ ta̱ uteku tsuna a ɓa̱nka̱ le.

11Alau a tsutuka̱ta̱ tsulau ci le e keteshe,

ama aza ugboji a tsu sokongu ta̱ ci le.

12Ɗa baci monogo mushuku yi n kadanshi ka aza uwa,

ana ntaji a̱ ni ra̱ka̱ ita̱ a kokpo aza a gbanigbani.

13Aza unambi n aza kalya dem vu le kete ka i,

Vuzavaguɗu ɗa u nekei le a̱shi adama e kene.

14Ɗa baci mogono ma yaꞋankai vuza vu unambi afada a singai,

tsugono tsu ni ci ta̱ a kugeshe ali ntsukaya.

15Ugbari u maku u tsu tuka̱ta̱ n ugboji,

ama maku magbanigbani ma tsu neke ta̱ a̱na̱kpa̱ ni wono.

16Ɗa baci aza a gbanigbani i o tsugono, kagbanigbani ka tsu yimkpa ta̱,

ama aza usuɓi i ta̱ a kuzuwa le a yikpa̱.

17Gbara muku n nu, i ta̱ a ku neke wu ma̱ta̱na̱ ma ka̱ɗu

ka̱ta̱ a zuwa wu ma̱za̱nga̱.

18Ɗa baci ubuta̱ wi babu kadanshi ka Ka̱shile, uma a tsu yaꞋanta̱ ida̱shi kavama.

Ama vuza ma̱ta̱na̱ ɗa a̱yi na u tonoi wila̱ u Ka̱shile.

19Kadanshi ku una̱ koci ka kugbara kagbashi ba,

adama na wita̱ a kupana ka̱ta̱ uyeve ama wa ku yaꞋan ili ba.

20Ka̱shile ka tsu kuɓa̱nka̱ ta̱ kalau gogo,

u laꞋa vuza kadanshi gogo babu cico.

21Vuza na baci uleꞋeshei kagbashi tun a̱yi kenu,

a ukoci wita̱ a kuɗika ka̱cika̱ni maku makpaꞋa.

22A za na a tsu yaꞋan wupa gogo, a tsu ɗengusa̱ta̱ vishili,

ka̱ta̱ kpamu a yaꞋan unushi wa a̱bunda̱i.

23A̱ra̱ɗi a vuma a tsu tuka̱i ta̱ n kugoyi,

ama ma̱riki mita̱ a kutuka̱ n tsugbayin.

24Vuma na de dem u yaꞋan cija̱Ꞌa̱ n koboki, u ciga wuma u ni ba.

ɗa baci a ɗeke ni tsugan ubuta̱ wa afada, u kupaɗa ta̱ bini.

25Kupana ku wovon u vuma, maza maꞋa

ama vuza na uzuwakai Ka̱shile a̱pa̱m u kuciya̱ ta̱ ma̱ta̱na̱.

26Uma n a̱bunda̱i a̱ tsu la̱nsa̱ ta̱ ucigi ubuta̱ wa ngono,

ama afada usuɓi, a Ka̱shile ka a ɗa i.

27I na vuza vu usuɓi u cigai ba, i ɗa kayan ka uwa,

i na tankpamu vuza gbanigbani u cigai ba, i ɗa vuza vu usuɓi.