Ansa 2

Ugain u cicoꞋo

1Maku ma̱ va̱,

ushuku n kadanshi ka̱ va̱.

ka̱ ta̱ vu sokongu kadanshi ka̱ va̱,

2Zuwa atsuvu a ukuna u cicoꞋo,

vu yaꞋan moloko ma na vu yeve i ɗa.

3Mayun,

folono uyevi ka̱ta̱ vu la̱nsa̱ kuyeve,

4la̱nsa̱ ku ɗa tsa azurufa,

vu la̱nsa̱ tsu na a̱ tsu la̱nsa̱ uciyi u na wi usokongi.

5Ka̱ta̱ vu yeve wovon u Vuzavaguɗu,

ka̱ta̱ vu ciya̱ kuyeve ku Ka̱shile.

6Adama a na Vuzavaguɗu ɗa u tsu neke cicoꞋo,

kuyeve n cicoꞋo kpamu,

a una̱ u ni u ɗa ku tsu uta̱.

7U tsu neke ta̱ aza a na

i o kutono mejege cicoꞋo,

a̱yi ɗa ma̱ra̱ga̱ wa aza

a na i o kutono derere.

8Adama a na utsu la̱na̱ ta̱

ukuna wa afada a mayun,

u tsu ere ta̱ uye wa aza a na i a kuciga yi.

9Yi ta̱ e kuyeve ukuna wu usuɓi n afada n ukuna u mejege,

n uye u na u gaꞋin dem.

10Adama a na vi ta̱ a̱ kuciya̱ cicoꞋo a̱ ka̱ɗu ka̱ nu,

kuyeve kpamu ki ta̱ e kuneke wu ma̱za̱nga̱.

11Kula̱na̱ ku nu ki ta̱ e ku ere wu

kuyeve ku nu ki ta̱ o kutono n avu.

12CicoꞋo ci ta̱ a̱ ku uta̱ka̱ wu a ka gbani-gbani.

a uma a kadanshi ka kavama.

13Aza a na a̱ ka̱sukpa̱i uye u mayun,

adama a na o yongo a uye u ka̱yimbi,

14aza a na a tsu pana uyoꞋo u kuyaꞋan ka gbani-gbani,

a̱ ma̱za̱nga̱ n ka gbani-gbani.

15aza a na uye u le wi magaba ba,

aza a na uye u le u modoruko u ɗa.

16CicoꞋo ci ta̱ e kere wu we ekiye a kashakanlai, vuza wi ukuna u na u kparasa wu n una̱ wu uyoꞋo u ni.

17vuza na u ka̱sukpa̱i vali vu ni a ayin a utsura a̱ ni,

vuza na u tsu koɗo uzuwakpani u na u yaꞋin e kelime ka̱ Ka̱shile.

18Adama a na kpaꞋa ku ni uye wu ukpa̱ u ɗa,

uye u ni a kubana a ubuta̱ wa̱ ukpisa̱ u ɗa.

19Vuza na baci de dem u banai ubuta̱ u ni, u tsu bono ba.

Wi o ku doku kubono a uye u wuma ba.

20Adama a nannai, mayun ɗa vu tono uye,

u na uma a singai o tonoi,

vu tono uye wa aza a usuɓi.

21Uma a na i a kuyaꞋan ukuna u mejege,

e le ɗa aza a na a̱ kuda̱sa̱ngu a iɗika ya. 22Ama i ta̱ a ku una aza a gbani-gbani punu a i ɗika ya,

aza a na i m ma̱riki ba, i ta̱ a ku takpa le punu.