Cingthuilawknaw 2

Lungang a sungrennae

1Ka capa, ka lawk hah ngâi nateh,

kaie kâpoelawknaw e hah na lungthung vah na pâkuem pawiteh,

2Lungangnae koe lah na hnâpakeng nateh,

na thai panuek nahanelah na lungthin na poe pawiteh,

3Kapek thai nahanelah na kaw teh,

thaipanueknae tawn hanelah na hram pawiteh,

4ngun patetlah na tawng teh,

hro e hno patetlah na tawng pawiteh,

5BAWIPA takinae na panue vaiteh,

Cathut panuenae hah na hmu han.

6Bangkongtetpawiteh, BAWIPA ni lungangnae a poe teh,

a pahni hoi panuenae hoi thaipanueknae hah ouk a tâco sak.

7Tamikalannaw hanelah lungangnae

katang hah a pâkhueng pouh teh,

kalan lah kacetnaw hanelah bahling lah ao.

8Kângingnae lam hah a ring teh,

a tamikathoungnaw e lamthung hah a ngue pouh.

9Hottelahoi, kângingnae hoi lannae na thaipanuek vaiteh,

ngaima tawnhoehnae hoi kahawi e lamthung hai na panue han.

10Na lungthin dawk lungangnae a kâen toteh,

panuenae teh, na hringnae kanawm sakkung lah ao han.

11Poukpanueknae ni na ngue vaiteh,

thaipanueknae ni na ring han.

12Tamikathoutnaw e lamthung dawk hoi na rungngang han.

Lawk longkawi lah ka dei e,

13Lannae lamthung ka pahnawt niteh,

hmonae lamthung dawn hanelah ka cet e,

14thoenae saknae dawk lungkahawi e,

tamikathout lanhoehnae dawk a lungkahawi e,

15Lam longkawi ka dawn niteh,

a lamthung dawk yuemkamcu hoeh e,

16Kahlong lae napui hoi

pasawtpanep lawk ka hno e,

17A naw nah hui ka cettakhai niteh,

a Cathut lawkkam kapahnimnaw koehoi

nang hah na rungngang han.

18Bangkongtetpawiteh, ahnie im ni duenae koe lah a hrawi teh,

ahnie lam ni tamikadoutnaw koelah a pâtam.

19Ahni koe kacetnaw teh ban boihoeh toe.

Hringnae lam hah dawn boi awh hoeh toe.

20Nang teh tamikahawinaw e lamthung na dawn vaiteh,

lannae lamthung pou na dawn thai nahane doeh.

21Bangkongtetpawiteh, tamikalan teh ram dawk kho a sak vaiteh,

tami kakuep teh hawvah pou ao han.

22Hatei, tamikathout teh talai van hoi takhoe lah awm vaiteh,

yuemkamcu hoeh naw hah phawk lah ao awh han.