Biblica® सुतंतर समकालीन छत्तीसगढ़ी अनुवाद
नीतिबचन 13
बुद्धिमान बेटा ह अपन ददा के सिकछा म धियान लगाथे,
पर ठट्ठा करइया ह डांट ला घलो नइं सुनय।
मनखेमन अपन बने बात के कारन बने चीजमन के आनंद उठाथें,
पर बिसवासघाती मनखे के भूख हिंसा करे म मिटथे।
जऊन मन अपन मुहूं म लगाम लगाथें, ओमन अपन परान के रकछा करथें,
पर जऊन मन बिगर सोचे गोठियाथें, ओमन नास हो जाथें।
आलसी मनखे के भूख कभू नइं मिटय,
पर मेहनती मनखे के ईछा पूरा होथे।
धरमी मनखे लबरा बात ले घिन करथे,
पर दुस्ट मनखे अपनआप ला एक दुरगंध के चीज सहीं बना लेथे
अऊ अपन ऊपर कलंक लगाथे।
धरमीपन ह ईमानदार मनखे के रकछा करथे
पर दुस्टता ह पापी मनखे ला नास कर देथे।
एक मनखे अपन ला धनवान जताथे, पर ओकर करा कुछू नइं रहय;
दूसर ह अपन ला गरीब जताथे, पर ओकर करा बहुंत धन होथे।
मनखे के धन ह ओकर जिनगी ला छुड़ा सकथे,
पर गरीब मनखे ह धमकी भरे डांट के जबाब घलो नइं दे सकय।
धरमी मनखे के अंजोर ह बहुंत चमकथे,
पर दुस्ट मनखे के दीया ह बुता जाथे।
घमंड के कारन झगरा होथे,
पर जऊन मन सलाह लेथें, ओमन म बुद्धि होथे।
बेईमानी के पईसा ह खतम हो जाथे,
पर जऊन ह थोर-थोर करके पईसा जमा करथे, ओ पईसा ह बढ़थे।
जब आसा के पूरा होय म देरी होथे, त मन ह बिचलित होथे,
पर मनसा के पूरा होवई ह जिनगी के रूख सहीं अय।
जऊन ह हुकूम ला तुछ समझथे, ओह येकर दाम चुकाही,
पर जऊन ह हुकूम ला मानथे, ओला ईनाम मिलथे।
बुद्धिमान मनखे के सिकछा ह जिनगी के झरना ए,
जऊन ह मनखे ला मिरतू के फांदा ले बचाथे।
सुबुद्धि ले अनुग्रह मिलथे,
पर बिसवासघातीमन के रसता ह ओमन के बिनास कोति जाथे।
जम्मो समझदार मनखे गियान के संग काम करथें।
पर मुरूखमन अपन मुरूखता देखाथें।
दुस्ट संदेसिया ह समस्या म पड़थे,
पर बिसवासयोग्य संदेसिया ह बने संदेस लेके आथे।
जऊन ह अनुसासन ला तुछ समझथे, ओह गरीबी अऊ लज्जा म पड़थे,
पर जऊन ह डांट ऊपर धियान देथे, ओह आदर पाथे।
ईछा के पूरा होवई ह मन ला गुरतूर लगथे,
पर मुरूख मनखे ह दुस्ट काम ला बिलकुल ही छोंड़े नइं चाहय।
बुद्धिमान के संगति कर, त तें घलो बुद्धिमान हो जाबे,
काबरकि मुरूख के संगी ला हानि उठाना पड़थे।
समस्या ह पापीमन के पाछू लगे रहिथे,
पर धरमीमन ला बने चीज के ईनाम मिलथे।
बने मनखे ह अपन नाती-पोतामन बर धन-संपत्ति छोंड़ जाथे,
पर पापी के संपत्ति धरमी बर रखे जाथे।
बंजर भुइयां ह गरीब बर फसल पईदा करथे,
पर अनियाय ह येला छीन लेथे।
जऊन ह अपन लइकामन ला छड़ी ले अनुसासित नइं करय, ओह ओकर बईरी अय।
पर जऊन ह अपन लइकामन ले मया करथे, ओह ओमन ला अनुसासित घलो करथे।
धरमी ह पेट भर खाय ला पाथे,
पर दुस्ट मनखे ह भूखन ही रहिथे।
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.