Biblica® Open Ang Pulong sa Dios
Oseas 5
Miingon pa ang Ginoo,
“Pamati kamong mga pari,
ingon man kamong mga katawhan sa Israel
ug mga miyembro sa panimalay sa hari,
kay kini nga paghukom batok kaninyo:
Nahisama kamo sa lit-ag,
kay gipasipad-an ninyo ang mga katawhan sa Mizpa ug sa Tabor.
Misupak kamo kanako ug misamot
ang inyong tinguha sa pagpamatay,
busa silotan ko kamong tanan.
Nasayod ako sa tanan mahitungod kaninyong mga taga-Israel1;
wala kamoy ikatago kanako.
Nagsimba kamo sa mga dios-dios2
busa nahimo kamong mahugaw.
“Ang inyong daotang mga binuhatan nagpugong kaninyo
sa pagbalik kanako nga inyong Dios.
Kay anaa sa inyong kasing-kasing ang espiritu
sa pagsimba sa mga dios-dios,
ug wala ninyo ako ilha nga Ginoo.
Ang inyong pagkamapahitas-on nagpamatuod
nga angay kamong silotan.
Ug tungod sa inyong pagpakasala malaglag
kamong mga taga-Israel,
ug malaglag uban kaninyo ang mga taga-Juda.
Mohalad kamo kanako ug mga karnero, kanding ug baka,
apan dili ninyo masinati ang akong presensya
kay magpahilayo ako kaninyo.
Giluiban ninyo ako kay ang inyong mga anak dili akoa.
Busa karon, laglagon ko kamo
ug ang inyong mga yuta sa usa lang ka bulan.3
Pasidaan sa Juda ug sa Israel
“Patingoga ang mga budyong ug mga trumpeta
aron mangandam ang mga tawo sa Gibea ug sa Rama!
Ipalanog ang singgit sa gira sa Bet Aven!
Pagbantay kamong mga katawhan sa Benjamin!4
Malaglag ang Israel sa adlaw sa pagsilot.
Mahitabo gayod ang akong giingon
batok sa mga tribo sa Israel!5
Ang mga pangulo sa Juda sama sa mga tawo nga gapamalhin
ug mga muhon kay giilogan nila ug yuta ang Israel.
Busa ibubo ko kanila ang akong kasuko sama sa baha.
Gidaog-daog ang Israel ug gilaglag
tungod kay gisilotan ko siya,
kay padayon gayod siya
nga nagsunod sa mga dios-dios.
Sama ako sa gagmayng mananap
nga mokutkot sa Israel ug sa Juda.
“Sa dihang nakita sa Israel ug sa Juda
ang katalagman6 nga midangat kanila,
nangayo ug tabang ang Israel sa gamhanang hari sa Asiria.
Apan ang hari dili makatabang kanila.7
Kay mahisama ako sa usa ka liyon ngadto sa Israel
ug Juda nga mokunis-kunis kanila.
Ako gayod mismo ang molaglag kanila.
Bihagon ko sila ug walay makaluwas kanila.
Pagkahuman, mobalik ako sa akong dapit,
hangtod nga angkonon nila ang ilang mga sala.
Ug unya modangop gayod sila kanako
taliwala sa ilang pag-antos.”
Source notes (7)
- Footnote Israel : sa Hebreo, Efraim. Makita usab ang pulong nga Efraim sa bersikulo 5 , 9 , 11-14 sa Hebreo. Tan-awa usab ang Ose. 4:17 .
- Footnote Nagsimba…dios-dios : sa literal, Nanapaw kamo.
- Footnote sa usa lang ka bulan : o sa Pista sa Pagsugod sa Bulan.
- Footnote mga katawhan sa Benjamin : ang Gibea, Rama, Bet Aven sakop kaniadto sa tribo ni Benjamin ( Jos. 18:21-28 ).
- Footnote Israel : ang tibuok nasod sa Israel (Juda ug Israel).
- Footnote katalagman : sa literal, balatian ug samad. Tingali ang buot ipasabot, mga problema nga politikal ug espirituwal.
- Footnote dili makatabang kanila : sa literal, dili siya makaayo sa ilang samad.
Biblica® Open Ang Pulong sa Dios. Copyright © 2009,2010,2014,2024 Biblica, Inc. Licensed under CC BY-SA 4.0. Trademark Statement “Biblica” narehistro kini nga tatak sa United States Patent ug Trademark Office sa Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.