यूहन्ना 17

यीशुएरी अपने लेइ प्रार्थना

1ज़ैखन यीशुए अपने चेलन सेइं एना सब गल्लां ज़ोई, त तैनी उबरू स्वर्गेरां तेकतां ज़ोवं, “हे बाजी हुन्ना तै वक्त ओरोए कि तू अपने मट्ठेरी महिमा केर, कि मट्ठू भी तेरी महिमा केरे। 2किजोकि तीं तैस सेब्भी मैनन् पुड़ अधिकार दित्तोरोए, ज़ैना तीं तैस दित्तोरेन हमेशारी ज़िन्दगी दे। 3ते हमेशारी ज़िन्दगी तै आए, कि तैना सिर्फ तीं एक्की सच़्च़े परमेशरे ज़ानन् ते यीशु मसीहे भी ज़ानन् ज़ै तीं भेज़ोरोए। 4मीं तैन कम ज़ैन तीं मीं दित्तेरू थियूं मुकेइतां धेरतली पुड़ तेरी महिमा की। 5ते हुनी हे बाजी मीं एप्पू सेइं साथी मेरी तै महिमा केर ज़ै दुनियारे पेइली मेरी तीं साथी थी।”

अपने चेलां केरे लेइ प्रार्थना केरते

6“मीं तेरू नवं तैन कां बांदू कियूं, ज़ैना तीं दुनियाई मरां च़ुनतां मीं दित्तोरेन तैना तेरे थिये, पन तीं मींजो दित्तोरेन ते तैनेईं तेरे बचने पुड़ अमल भी कियोरूए। 7हुनी तैना ज़ानतन, कि ज़ैन किछ तीं मीं दित्तेरू तैन सब तेरी तरफांए। 8एल्हेरेलेइ मीं तैना गल्लां ज़ैना तीं मीं दित्तोरी थी, मीं तैन पुज़ेई ते तैनेईं तैन पुड़ विश्वास कियो, ते सच़ पिशानू, कि अवं तेरी तरफां ओरोईं, ते ई भी विश्वास कियो कि तीं अवं भेज़ोरोईं। 9अवं तैन केरे लेइ प्रार्थना केरताईं, दुनियारे लोकां केरे लेइ न केरि, पन तैन केरे लेइ ज़ैना तीं मीं दित्तोरेन, किजोकि तैना सब तेरे आन। 10ते ज़ैन किछ मेरू आए, तैन सब किछ तेरूए, ते ज़ैन तेरू तैन मेरूए, ते इन सेइं मेरी महिमा बांदी भोईं। 11मीं हुनी इस दुनियाई मां नईं रानू, पन तैना हेजू इस दुनियाई मां आन, ते अवं तीं कां एजताईं, हे पवित्र बाजी, अपने तैस नंव्वे सेइं ज़ैन तीं मीं दित्तोरूए, तैन केरि हफाज़त केर, कि तैना असन बराबर भोन। 12ज़ैखन अवं तैन सेइं साथी थियो, मीं तेरे तैस नंव्वे सेइं, ज़ैन तीं मीं दित्तोरूए, तैन केरि हफाज़त की, मीं तैन केरि देख भाल की, नाश भोनेबाले मैनेरे अलावा कोई नाश न भोव, एल्हेरेलेइ पवित्रशास्त्रेरी गल पूरी भोइ। 13पन हुन्ना अवं तीं कां एजताईं, ते इना गल्लां अवं दुनिया मां ज़ोताईं, कि तैना मेरी खुशी एप्पू मां पूरी केरन। 14मीं तैन तेरू वचन तैन कां पुज़ेवरुए, ते दुनियारे लोकेईं तैन सेइं दुश्मनी रख्खी, किजोकि ज़ेन्च़रे अवं दुनियारो नईं, तैना भी नईं। 15मेरी प्रार्थना ई नईं कि तू तैन दुनियाई मरां ने, पन तू तैन शैताने करां बच़ेइतां रख। 16ज़ेन्च़रे अवं दुनियारो नईं तैन भी इस दुनियारे नईं। 17तेरू वचन सच़्च़े। सच़्च़ेरे ज़िरिये सेइं तैन पवित्र केर। 18ज़ेन्च़रे तीं अवं दुनियाई मां भेज़ोरोईं तेन्च़रे मीं भी तैना दुनियाई मां भेज़ोरेन। 19अवं अपनो आप तैन केरे लेइ पवित्र केरताईं, ताके तैना भी सच़्च़ेरे ज़िरिये सेइं पवित्र भोन।”

सेब्भी विशवैसी केरे लेइ यीशुएरी प्रार्थना

20“मेरी प्रार्थना सिर्फ चेले केरे लेइ नईं, पन तैन केरे लेइ भी ज़ैना तैन वचनेरे ज़िरिये मीं पुड़ विश्वास केरेले। 21कि तैना सब अक भोन, ज़ेन्च़रे तू बाजी मीं मां आस, ते अवं तीं मां आई तेन्च़रे तैना असन मां भोन, एल्हेरेलेइ दुनियारे लोक विश्वास केरन, कि तींए अवं भेज़ोरोईं। 22ते तै महिमा ज़ै तीं मीं दित्तोरीए, कि ज़ेन्च़रे अस अक आम तैन भी अक भोन। 23अवं तैन मां भोइलो, ते तू मीं मां भोलो, ताके तैन पूरो अकीजो भोए, ते दुनिया ज़ांने कि तीं अवं भेज़ोरोईं। ज़ेन्च़रे तीं मीं सेइं प्यार कियो, तेन्च़रे तीं तैन सेइं भी प्यार कियो। 24हे बाजी अवं चाताईं कि ज़ैना तीं मीं दित्तोरेन, ज़ैड़ी अवं आईं तैड़ी तैना भी मीं सेइं साथी भोन, कि तैना भी मेरी महिमा हेरन, ज़ै तीं मीं दित्तोरीए। दुनियारे रच़ने करां भी पेइले तीं, मीं सेइं प्यार कियोरोए। 25हे धर्मी बाजी, दुनियां तू न पिशानो, पन मीं तू पिशानो, ते तैन चेलेईं भी अवं पिशानो कि तीं अवं भेज़ोरोईं। 26मीं तैन पुड़ बांदू कियूं, कि तू कौन आस, ते बांदू केरतो रालो, ज़ैस प्यारे सेइं तीं मीं प्यार कियो, तै तैन मां भोए, ते अवं तैन मां बनोरो रेईं।”