Gesami Hea:su 34

Gode Ea Noga:idafa Hahawane Hou amoma Nodosu

11

Na da eso huluane Hina Godema nodone sia:mu.

Na da Ema nodone sia:su hamedafa yolesimu.

2Na da Ea hamobeba:le, Ema nodone sia:mu.

Dunu huluane amo da enoga banenesi,

amo da na nodosu nabimu amola hahawane ba:mu da defea.

3Hina Gode Ea bagadedafa hou amo ninia gilisili sisia:i lala:di!

amola ninia huluane gilisili Ea Dio amoma nodone sia:na:di.

4Na da Hina Godema sia:ne gadobeba:le, E da nama dabe adole i.

E da na beda:su hou amo huluane fadegale fasi.

5Inia: houga banenesisi dunu, ilia da Emaba:le hahawane nodogia:mu.

Amola ilia dafawaneyale hamoma:beyale dawa:lusu logo

bu hame hedofai ba:mu.

6Gogobihei dunu Ema wele sia:sea, E da dabe adole iaha.

Amola ilia bidi hamosu da ilila: wadela:sa:besa:le, E da ili gaga:sa.

7Hina Gode Ea a:igele dunu da Ea sia: nabawane hamobe dunu amo gaga:sa.

Amola se nabasu ilima mae doaga:ma:ne gaga:sa. 82

Dilisu Hina Gode Ea noga:idafa hou hogole ba:ma!

Dunu amo Ea gaga:su hogole ba:beba:le, ilia da hahawane bagade ba:sa.

9Dilia! Hina Gode Ea fi dunu huluane!

Ea sia: nabawane hamoma!

Dunu amo da Ea sia: nabawane hamobe,

ilia da ilia wali esaloma:ne lamu liligi defele huluane ba:sa.

10Laione wa:me amolawane da ha:su hou dawa:.

Be nowa dunu da Hina Gode Ea sia: nabawane hamosea,

da liligi noga:idafa ba:lala.

11Na sama ayeligi dunu! Dilia misini amola na sia: nabima!

Na da dilima Hina Godema nodosu hou olelemu. 123

Dilia hahawane nodone esalumusa: hanabela:?

Dilia da esalusu sedagili amola hahawane esalumusa: hanabela:?

13Amai galea, wadela:i ledo hamoi sia: sia:su amola ogogosu hou yolesima!

14Wadela:i hou yolesili, noga:i hou fawane hamoma!

Olofosu hou hamoma:ne, logo hogoi helema!

15Hina Gode da moloidafa dunu ilima ba:le gasa,

amola ilia dini ianebe naba.

16Be E da wadela:i hamosu dunu ili higale ba:sa.

Amaiba:le, ilia da bogosea, hedolowane gogolei dagoi ba:mu.

17Moloidafa dunu ilia da Hina Godema wele sia:sea, E da naba.

E da ilia bidi hamosu, amo bu mae ba:ma:ne gaga:sa.

18Hina Gode da da:i dioi dunu ilima gadenene esala.

Amola E da dafawane hamoma:beyale dawa:lusu fisi dunu, amo ili gaga:sa.

19Moloidafa dunu da bidi hamosu bagohame ba:sa.

Be Hina Gode da ili amo huluane bu mae ba:ma:ne gaga:sa. 204

Hina Gode da agoaiwane dunu dafawanedafa gaga:sa.

Amola ea gasa afae hamedafa fi ba:sa.

21Wadela:le hamosu dunu ilia da wadela:i hou amoga medole legei dagoi ba:mu.

Nowa da moloidafa hou higasea, e da se bidi lamu.

22Hina Gode da Ea fi dunu gaga:mu.

Amola nowa dunu da Ea gaga:ma:ne Ema ahoasea, e da gaga:i dagoi ba:mu.