Yoube 9

1Yoube da bu adole i,

2“Ma! Na da amo sia: huluane musa: nabi dagoi.

Be osobo bagade dunu da habodane Godema moloma:ne fofada:ma:bela:?

3Osobo bagade dunu da Godema fofada:mu hamedei galebe.

E da osia:i (1,000 agoane) adole ba:sea,

nowa da Ema bu adole imunu dawa:ma:bela:?

4Gode da asigi dawa:su bagadedafa gala amola gasa bagade gala.

Osobo bagade dunu da Ema dabele sia:mu da hamedei.

5E da mae sisane, goumi gaguli asili eno sogebiga ligisisa.

E da ougiba:le. goumi gugunufinisisa.

6Gode da bebeda:nima iasili, osobo bagade da yagugusa.

Fedege agoane, E da osobo bagade golasu ifa bai amo yagugusa.

7E da eso ea mabe hedofamusa: dawa:.

E da gasia gasumuni ilia diga:be hou hedofamusa: dawa:.

8Gode Hisu da mu hahamoi.

Eno dunu da E hame fidisu.

Gode hisu da hano wayabo bagade ganodini esalebe ohe bagade

amo ea baligiga ososa:gisa.

9Gode da gasumuni huluane muagado bugisisi.

Gasumuni eno ilia dio da Bea Bagade, Olione, Bileidese, amola ga (south) gasumuni huluane.

10Ea gasa bagade hamobe, ninia da dawa:digimu hame dawa:.

Ea musa: hame ba:su hamobe da hamedafa dagomu.

11Gode da bobaligila ahoa, be na da E hame ba:sa.

12E da hi hanaiga liligi laha.

Amola Ea logo enoga hedofamu da hamedei.

Dunu huluane da beda:iba:le,

Ema, “Di adi hamosala:?” amane sia:mu da hamedei ba:sa.

13Gode Ea ougi hou da eso huluane dialumu.

Hano wayabo bagade ohe (La:iha:be) da Godema gegei.

Godema ha lai dunu da La:iha:be fuligala:i.

Be Gode da ili huluane hasalasi.

14Amaiba:le, na da habodane Godema bu fofada:ma:bela:?

15Na da wadela:i hou hamedafa hamoi.

Be Gode da na fofada:su dunu.

Amaiba:le, na da logo hame gala.

E da nama asigima:ne fawane, na da Ema edegemu.

16Be E da na Ema sia:mu logo doasisia, E da na sia: nabima:bela:?

17E da udigili na se nabima:ne, isu gibula bobodobe, na fama:ne, iasisa.

18Ea hamobeba:le, na da mifo lamu gogolei.

Ea hamobeba:le, na esalusu da da:i dioi amoga nabai gala.

19Na da Ema sesele hamoma:bela:?

Osobo bagade dunu da Godema sesemu hamedei.

Na da E fofada:su diasuga oule masa:bela:?

Be nowa da E amoga masa:ne sesema:bela:?

20Na da wadela:i hou hamedafa hamoi, amola dafawaneyale dawa:su hou hame fisi.

Be na sia: da wadela:i hamosu dunu ea sia: agoai gala.

Na sia:be huluane da nama se dabe imunu fofada:su liligi agoai ba:sa.

21- 22Na da wadela:i hou hame hamoi.

Be na da da:i dioiba:le, bu hame dawa:digisa.

Na da bu esalumu higa:i gala.

Liligi huluane da hamedei.

Gode da wadela:i dunu amola moloidafa dunu, amo defele, gugunufinisimu.

23Moloidafa dunu da hedolo bogosea, Gode da nodosa.

24Gode da osobo bagade amo wadela:i hou hamosu dunu ilima i dagoi.

E da moloidafa fofada:su dunu huluane ilia si wadela:lesi dagoi.

Gode da amo hame hamoi ganiaba, nowa da hamobela:?

25Na esalebe eso da hehenasa. Amo eso huluane da wadela:i gala.

26Na esalusu da dusagai ea hehenasu agoai gala.

Na esalusu da buhiba ea ohe fonobahadi famusa:, adogomusa: hagili dabe agoane daha.

27- 28Na da se nabasu gogolema:ne, onigisia, na da bu se naba.

Gode da na da wadela:le hamosu dunu dawa:sa.

29Amaiba:le, Gode da nama fofada:nanu, na da wadela:i dunu sia:beba:le,

na da abuliba:le Ema dawa:ma:bela:?

30Safoga da na wadela:i hou dodofemu hamedei galebe.

31Gode da na amola ledo bagade gilisili uli dogoiga ha:digi dagoi.

Fedege agoane, na abula da na da:i hodo ba:sea, gogosiasa.

32Gode da osobo bagade dunu ganiaba, na da Ema adole ia:noba.

Ania da sia:ga gegei hahamoma:ne, fofada:su diasuga ahoa:noba.

33Be ania dogoa aligili, gaga:su dunu da hame gala.

Gode amola na, anima fofada:su dunu da hamedafa.

34Gode! Nama se iabe yolesima!

Na bu beda:ma:ne, maedafa hamoma!

35Na da Dima hame beda:i! Na da sia:mu!

Bai na da na asigi dawa:su dawa:!