Yoube 31

1Na da uda eno mae magesa:i ba:ma:ne, Godema dafawaneyale ilegele sia:i.

2Gode Bagadedafa da ninima adi hamosala:?

E da habodane osobo bagade dunu ilia houba:le dabe iabela:?

3E da wadela:le hamosu dunuma gugunufinisisu hou amola wadela:lesisu hou iasisa.

4Gode da na hamobe liligi huluane dawa:.

E da na osa:le gagabe huluane ba:lala.

5Na da dafawane ilegele sia:sa!

Na da wadela:le hamedafa hamosu.

Amola na da eno dunuma hamedafa ogogosu.

6Gode da moloidafa dioi defesu amo da:iya, na adoba:mu da defea.

Amasea, na hou da moloidafa, E da ba:mu.

7Na da logodafa fisiagai ganiaba, o wadela:le hamomu hanai ganiaba,

o na lobo da wadela:le hamoiba:le ledo hamoi ganiaba,

8defea, na ha:i manu bugi da wadela:lesi dagoi ba:mu da defea,

amola dunu enoga na bugi moma:mu da defea gala:loba.

9Na da na na:iyado idua hanaiwane ba:i ganiaba,

amola amo uda ea logo ga:su gadili wamoaligi ouesalebe ba:i ganiaba,

10defea, na uda da eno dunu ea ha:i manu gobemu,

amola e da dunu eno amola gilisili golamu da defea gala:loba.

11Nowa da agoane wadela:le hamosea, ilima se iasu da bogosu ba:mu da defea.

12Na da agoane wadela:i hou hamoi ganiaba,

amo hou da gugunufinisisu Helo lalu defele ba:la:loba.

Amola amo lalu da na gagui huluane na dagola:loba.

13Musa:, na hawa: hamosu dunu ilia da nama egasea,

na da ilia sia: nabalu, ilima moloidafa hamosu.

14Na da amane hame hamoi ganiaba, na da Gode Ea midadi habodane leloma:bela:?

Gode da nama fofada:musa: masea, na da Ema adi sia:ma:bela:?

15Gode da na da:i hahamoi.

Amola Ea da na hawa: hamosu dunu ili amolawane hahamoi dagoi.

16Na da hame gagui dunu fidimusa: hamedafa hihi.

Na da didalo uda ili se nabawane esaloma:ne, hamedafa yolesi.

17Na da ha:i sadini nanu, guluba: mano ha:aligi esaloma:ne hamedafa yolesi.

18Na esalusu huluane amoga na da amo hahani dunu noga:le ouligilalusu.

19Na da hame gagui dunu amo da abula bidi lamu hamedei ba:loba,

20na da sibi hinabo amo na da na sibi wa:iga lai, amoga hamoi abula ema iasu.

Amalalu, e da nama nodosu.

21Na da fofada:su diasuga hasalimu dawa:bela:le,

guluba: mano afae ema ogogole hamoi ganiaba,

22na lobo fimu amola na ougia dagalisi dagoi ba:mu da defea gala:loba.

23Na da agoai hou hamomu hamedafa dawa:i.

Bai na da Gode Ea se dabe imunu amoga beda:sa.

24Na da bagade gagui hou amo da bai bagadeyale hamedafa dawa:su.

25Amola na da bagade gaguiba:le, hame hidasu.

26Na da eso ea hadigi amoma nodone hame sia:ne gadosu.

Amola oubi gela:gegei amoma nodone hame sia:ne gadosu.

27Na wadela:le hamoma:ne, na da ili (oubi amola eso) amoma asigi sia:musa:,

na lobo nonogonanu hame oleagasu.

28Agoai wadela:i hou amoma se dabe iasu da bogosu ba:mu da defea.

Amo wadela:i hou da Gode da hame esala, amo defele olelesa.

29Nama ha lai dunu da se nababeba:le, na da hamedafa nodosu.

Amola gugunufinisisu hou ilima doaga:beba:le, na hame nodosu.

30Na da ili bogoma:ne, na da hamedafa wadela:le sia:ne gadoi.

31Nama hawa: hamosu dunu huluane da na da eso huluane ga fi yosia:sa, amo dawa:.

32Na da lalusu dunu na diasuga aowamusa: misa:ne sia:su.

Ilia udigili logoga golasa:besa:le, na ili aowasu.

33Dunu oda ilia da ilia wadela:i hou wamolegemusa: dawa:.

Be na da na wadela:i hou hamedafa wamolegesa.

34Na da eno dunu ilia sia:be amoga hame beda:su.

Ilia gadesu hou amoma beda:iba:le,

na da hame ouiya:su amola diasu gelabo ganodini hame ouesalusu.

35Dunu afae da na sia: nabima:bela:?

Na da Gode Bagadedafa Ea Dioba:le ilegele sia:sa.

Na sia: huluanedafa da dafawane.

Gode Hi da nama adole imunu da defea.

Ilia da fofada:su liligi amo nama ha lai dunu da nama fofada:nanu,

amo huluane na ba:ma:ne dedene legemu ganiaba,

36na da na gida da:iya hahawane gasisalala:loba

amola habuga agoane na dialuma da:iya figisila:loba.

37Na da na hamoi hou huluane Godema adola:loba,

amola Ea midadi na moloi hou dawa:beba:le,

na dialuma mae fili guduli, hahawane lela:loba.

38Be na da na bugili nasu soge, amo soge edadafa ilima wamolai ganiaba,

39na da ha:i manu amogai bugi mai ganiaba,

amola ifabi hawa: hamosu ilima ha:i manu hame iabeba:le,

ilia ha:ga bogomu logo doasi ganiaba,

40defea amo sogega widi amola bali mae heda:le,

udigili gagalobo amola aya: gaga:nomei gisi heda:mu da defea gala:loba.”

Yoube ea sia: da dagoi wea.