Yoube 29

Yoube da ea Fofada:su Dagomusa: Sia:i

1Yoube da bu amane sia:i,

2Gode da musa: na esalusu noga:le ouligi.

Na da bu agoane esalumu da defea galu.

3Amo esoga, Gode da na mae fisili, ani ahoasu.

Na da gasi ganodini ahoabeba:le, E da nama hadigi iasu.

4Amo esoga na da bagade gaguiwane ba:i.

Gode da nama dogolegeiba:le, E da na diasu amola sosogo fi gaga:i.

5Gode Bagadedafa da ani esalu.

Amola na mano huluane hahawane nini dafulili lelefulu.

6Na bulamagau amola goudi, ilia da dodo maga:me bagade i.

Amola na olife ifa ilia da igi galoase osobo da:iya noga:le heda:i.

7Na moilai bai bagade asigilai dunu da sia: sa:imusa: gilisilaloba,

na amola da ilima gilisi.

8Ayeligi dunu da na ba:le, gasigasu.

Amola da:i hamoi dunu da nama yosia:musa:, wa:legadosu.

9Dunu fi ouligisu dunu da naba:le sia: ouiya:su.

10Mimogodafa dunu da ouiya:le esalebe ba:su.

11Dunu huluane da na hou ba:beba:le, o enoga amo hou nababeba:le,

ilia da na hou amoma nodone sia:i.

12Hame gagui dunu da digini wele sia:beba:le, na da ili fidisu.

Na da guluba: mano amo da fidisu dunu hamedafa gala, ili fidi.

13Dunu amo da da:i dioi bagadedafa nabi, ilia da nama nodosu.

Amola uda didalo gaga:iwane esaloma:ne, na fidisu.

14Na da eso huluane moloidafa hou fawane hamonanu.

15Na da fedege agoane, si dofoi dunu ilia si agoai galusu,

amola emo gasuga:igi dunu ilia emo agoai galusu.

16Na da hame gagui dunu ilia eda agoai galusu.

Amola ga fi da bidi hamosu ba:loba, na da ilimagai galusu.

17Na da nimi bagade dodona:gi dunu ilia gasa wadela:lesi.

Amola dunu amo da iliba:le se nabi, amo gaga:i.

18Na da ode bagohame esalumu, amola hahawane na diasuga bogomu dawa:i galu.

19Na da ifa amo ea difi da eso huluane hano defele naha,

amola ea amoda amola lubi da eso huluane oubi baeyaga nanegasa,

amo defele ba:su.

20Dunu huluane da na houba:le, nodonanusu.

Na gasa da hamedafa dafamu agoai ba:su.

21Na da fada:i sia:sea, eno dunu da ouiya:lewane nabasu.

Ilia da na sia: dawa:iwane nabasu.

22Na da sia: dagoloba, ilia eno sia:mu hamedei ba:su.

Na sia: da gibu ea dabe agoai ba:su.

23Ifabi ouligisu dunu da woufo oubi gibu yosia:be,

amo defele, dunu huluane da na sia: hahawane nabasu.

24Ilia da dafawane hamoma:beyale dawa:su fisi dagoi galea,

na da ilia dogo denesima:ne, ilima ohomogisu.

25Na da ilima ouligisu hou hamone, ilegesu hamosu.

Hina bagade da ea dadi gagui wa:i gegemusa: oule ahoabe defele,

na da ili bisili oule ahoasu.

Amola ilia da heawini da:i dione esalea, na da ilia dogo denesinisisu.