Yoube 11

1Soufa da amane sia:i,

2“Nowa da amo gagaoui sia: amoma adole ima:bela:?

Di da sia: bagade sia:beba:le, bu moloidafa hamobela:? Hame mabu!

3Yoube! Di adi dawa:bela:?

Di da ninia dima adole imunu da hamedei amo dawa:sala:?

Di da habosesele sia:beba:le, ninia da sia: hamedei agoane ba:mu, di da dawa:sala:?

4Dia sia: da dafawane, di da sia:sa.

Di da Gode Ea ba:ma:ne moloi fawane, di da sia:sa.

5Na hanai da Gode Hisu da dima adole imunu da defea.

6E da dima adole iabe ganiaba,

E da dima Ea asigi dawa:su houdafa da osobo bagade dunu

ilia asigi dawa:su bagadewane baligisa, amo adole ia:noba.

Gode da dia hamobe defele, se hame iaha.

7Di da Gode Ea bagadedafa hou

amola gasa bagade hou huluane dawa:mu da hamedei.

8Di da mu digili ba:mu gogolesa.

Be Gode da mu amola liligi huluane baligisa.

Gode da bogoi dunu ilia soge dawa:be.

Be di da amo hame dawa:.

9Gode Ea bagadedafa hou da osobo bagade

amola hano wayabo bagade elea ba:de baligisa.

10Gode da di afugili gagulaligisia, amola fofada:musa: di oule ahoasea,

nowa da Ea logo hedofama:bela:?

11Gode da hamedei dunu huluane dawa:.

E da ilia wadela:i hou huluane ba:lala.

12Sigua dougi da fofoi dougi defele lalelegesea,

amo esoga gagaoui dunu da muni bagade dawa:su dunu defele ba:mu.

13Yoube! Dia hou moloma!

Godema sinidigima!

14Dia wadela:i hou yolesima!

15Amasea, di mae beda:iwane, osobo bagadega bu hahawane esaloma!

16Amasea, di da dia bidi hamosu amo bu hame dawa:mu.

Hano leda:sea, fonobahadi dialu, bu hasa.

Amo defele, dia bidi hamosu wali diala, da hobea bu hame ba:mu.

17Dia esalusu da eso dogoa digagala:be defele ba:mu.

Amola dia se nabasu eso da hehebolo mabe defele ba:mu.

18Di da gaga:iwane amola dafawane hamoma:beyale dawa:iwane esalumu.

Gode da di gaga:le, dima helefisu imunu.

19Di da dia ha lai dunuma hame beda:mu.

Dunu bagohame da dia ili fidima:ne adole ba:mu.

20Be wadela:le hamosu dunu da ba:le gagale, da:i dioi fawane ba:mu.

Ilia da hobeamu logo hame ba:mu.

Ilia hanai da ilia hedolowane bogoma:ne fawane dawa:sa.”