እብራዊ 3

የሱሳ ሙሴኮ ካሮራሮ ላኖ

1ሃኑን እስና አዴን ኡምት ታዋይ ኦኡማንተታን ቁሉኒዕ አማኒል! አማኖካኑን ካፋራመሮና ቱቃሞልኮክ ዎይቻ የሱሳ ሻዳ። 2ሙሴ ምን ካዋ ዱባን ካአብዳመ ጎጎሌረክ ማለ የሱሳና ኡሱ ካሹመሮ ዋዉን ካአብዳመየ። 3ምን ካማዳራራ ምንኮ ታሮርቴ ካባጃ ጎጎአቦ ማለ የሱሳና ሙሴኮ ታሮርተ ታአቲ ካባጃ ማንኮዶትሳሮ ማራን ካባጃመ።1 4ኦግራን ምን ዱባ መተመተይ ካማዳራሮ እባዶ አባ፤ ካመን ዱባ ካፈለራ አደ ዋያ። 5ሆረንባዉን አማሚን ካዶትሳሮ አየስ ዱባን አቶታ ሙሴ ምን ካዋ ዱባይ ካሀንዳሮ ኣን ካአብዳመየ። 6ክርስቶሳ አደ ምን ካዋይ ካአብዳመ ካኮሌራ ኤረ ኣን ሌጉረየ። ምንኬሳና ኖና፤ ምንኬሳ ካኮንሊናና ካኮአብዳታኖ አዬስና ታኮዳታኖ አብድ አታይሳይ ጎአባነያ።

አብዳታናዋትኮክ ጋራ ካስሳመሮ ሴርሳኖ

7ሃኑን አያና ቁሉክ ጎጎአማሮ፥

“ህታር ያየቴሳ ጎማልቴን፥2

8-9ቃሉላቶክ ኡሊ ኦዶላልክስን እን ጎጎጫፈራንክ ማሌና ሜላነ እን ጉት ጎጎኬራንክ ማለ

እስና ዎዳናትስን ታአጃጃሞን አሮየላቴን፤

ኤሰ እሶ እን ጫፌን፤ ኢነ ዎታ ታማጋተን፤

ጌስ አፋርታሙን አን ካፈለሮና ዴን” አማራ ዋ።

10ሃኑን አን ሀሴ አላታኒ አማራየጉረ፥

“ዎዳናትሶ አርጌቶ ሽርማታ፤

ራኬና ላኮአዴሴራን አመ።”

11አደና

“ ‘አን ታስስናሮ ታፎልሲ ባንኤቴ ቶስ ላኮታብናራን!’ አመ

አማራንቴይ አን አማተራ።”

12አቢላልቴ! እስን ኦሮኮ ማዮና አርዶክ ዋኮ ታፋክሶ ታሜላና ታአማኖን ዎዳና እስኑን ጎጎግኖንኮ እስኦራዬን። 13አየሱን ጎአመን እስንኮ ጩቦይ ሶባምረ ዎዳናቴሳ ታአጃጃሞን ጎጎየላኖንኮ፥ “ህታር” አማመ ካኡማማራ ጎራታ ግራን አርጌቶ እስእስአታይሳየን። 14ሆራርጀ ካአባነኖ አማኖካን ታጋቾ አሪ ታ ጌኖን አታይሳይ ጎአባነ ክርስቶሳነ ዎታ ኦኤልናኖ ልናና።

15ህክና፥ “ህታር ያየቴሳ ካኮማልታን ጎራታ

አብጆላልክስን ሜላነ ካኮከኬሰረን ጎራታ ጎጎየለራን ማለ ዎዳናትስን ታአጃጃሞን አሮየላቴን” አማመ ጎጎጻፋመሮያ።

16ጎሌና ሀኑኡ ያየቴሳ ማለን አባባተረን ኦሜልለረን አዮስዬን? እሶ ላ ሙሴ ሆረ ሀየ ቃጄልሳ ኡል ካግብጽኮ ኦቤሬንየና? 17ጌስ አፋርታም ዱባ ዋ አማራይሳ ኦግረን አዮስዬን? ላሀኑኡ ጩቦ ኦፈለራና እሶ ጎየሬን ሬስክሶ ቃሉላቶክ ኡል እዬ ኦኮንሄሰሮየና? 18አደና ሀኑኡ አጃጃማኖ ኦዲዴረን ኳሬ፥ “እስን ታፎልሲ ባንኤቴ ቶስ ላኮታብናታን” አመ ኡሱ ካኮንማተራ አዮስዬን? 19ጎርታኑን እሶ ታብን ካኮዋተራን አማናናዋትኮት ኣላንቲ ላኖ አዴሳና።