Godɨn Eghaghanim: Akar Gavgavir Dɨkɨrɨzir Ghurim ko Igiam
Onger Akaba 136
God mɨnabir ighiam
Ikiavɨra Itir God, bar arazir aghuibar e gami, kamaghɨn e a mɨnabagham.
A zurara en apangkuvigha mamaghɨra iti.
Ikiavɨra Itir God, godɨn ifavaribagh afiragha bar ekefe.
Kamaghɨn e a mɨnamam.
A zurara en apangkuvigha mamaghɨra iti.
Ekiam nguazir kamɨn gumazir ekiaba bar dagh afira.
Kamaghɨn e a mɨnamam.
A zurara en apangkuvigha mamaghɨra iti.
A uabɨra mirakelɨn ekiabagh ami.
A zurara en apangkuvigha mamaghɨra iti. 2
A uan nɨghnɨzir aghuimɨn overiamɨn ingari.
A zurara en apangkuvigha mamaghɨra iti. 3
A nguazim isa dɨpabagh isɨn an ingarizɨ an aperaghav iti.
A zurara en apangkuvigha mamaghɨra iti. 4
An aruem ko iakɨnimɨn ingari.
A zurara en apangkuvigha mamaghɨra iti.
An aruem atɨzɨma an aruemɨn isiragha gari.
A zurara en apangkuvigha mamaghɨra iti.
A iakɨnim ko mɨkoveziba atɨzɨma me dɨmagarimɨn isira.
A zurara en apangkuvigha mamaghɨra iti. 5
A Isipian otarir ivariabagh soghezɨ me ariaghire.
A zurara en apangkuvigha mamaghɨra iti. 6
A Israelian gumazamiziba inigha Isipɨn kantri ategha azenan ize.
A zurara en apangkuvigha mamaghɨra iti.
A uan gavgavir ekiamɨn, ua me inigha ize.
A zurara en apangkuvigha mamaghɨra iti. 7
An Ongarir Aghevim gamizɨ a tongɨra biaghɨrɨ.
A zurara en apangkuvigha mamaghɨra iti.
A uan gumazamizibar faragha ghua, ongarir kam biaghirɨzɨ naghɨn, an an tongɨra me inigha azenan ize.
A zurara en apangkuvigha mamaghɨra iti.
A Isipɨn atrivim ko an mɨdorozir gumaziba avigha Ongarir Aghevimɨn me makunizɨ me dɨpam amegha ariaghire.
A zurara en apangkuvigha mamaghɨra iti. 8
A uan gumazamizibar faragha ghua me inigha gumazamiziba puvatɨzir danganimɨn ghuava otifi.
A zurara en apangkuvigha mamaghɨra iti.
An atrivir bar gavgavibav soghezɨ me ariaghire.
A zurara en apangkuvigha mamaghɨra iti.
An atrivir ziaba itibav soghezɨ me ariaghire.
A zurara en apangkuvigha mamaghɨra iti. 9
An Amorian Atrivim Sihon, a mɨsoghezɨ an areme.
A zurara en apangkuvigha mamaghɨra iti. 10
A Basanian Atrivim Ok, a mɨsoghezɨ an areme.
A zurara en apangkuvigha mamaghɨra iti.
An atrivir kabar nguazim isa uan gumazamizibagh anɨngi.
A zurara en apangkuvigha mamaghɨra iti.
A nguazir kam isa uan ingangarir gumazim Israel ganɨngizɨ, nguazir kam men nguazimra mɨn iti.
A zurara en apangkuvigha mamaghɨra iti.
En apaniba e abɨrima an e gɨnɨghnɨghavɨra iti.
A zurara en apangkuvigha mamaghɨra iti.
A en apanibar dafaribar uam e ini.
A zurara en apangkuvigha mamaghɨra iti.
A dagheba isa gumazamiziba ko asɨziba bar me ganɨdi.
A zurara en apangkuvigha mamaghɨra iti.
Bizir kabanang bagh, e Godɨn uan Nguibamɨn itim mɨnamam!
Bar guizbangɨra, a zurara en apangkuvigha mamaghɨra iti!
Source notes (10)
- Cross-reference 1 Eghaghaniba 16:34; 2 Eghaghaniba 5:13; 7:3; Esra 3:11; Onger Akaba 100:5; 106:1; 107:1; 118:1; Jeremaia 33:11
- Cross-reference Jenesis 1:1
- Cross-reference Jenesis 1:2
- Cross-reference Jenesis 1:16
- Cross-reference Ua Me Ini 12:29
- Cross-reference Ua Me Ini 12:51
- Cross-reference Ua Me Ini 14:21-29
- Cross-reference Ua Me Ini 13:18; 15:22
- Cross-reference Dɨboboniba 21:21-30
- Cross-reference Dɨboboniba 21:31-35
Godɨn Eghaghanim: Akar Gavgavir Dɨkɨrɨzir Ghurim ko Igiam. Copyright © 2020 Pioneer Bible Translators. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.