A̠luk

Ib̠eb̠i Asu̠gbagba Ma̠ Agu̠o̠

A̠luk

Age̠ Bho̠

Otighom

Ib̠eb̠i Asu̠gbagba Ma̠ Agu̠o̠ A̠luk Age̠ Bho̠ na̠ a̠leriom agu̠o̠ A̠zizo̠s aro̠ ma̠ Witenemeni ebhugh Izre̠l na̠ eb̠la̠ e̠ma-ra̠nwunom. A̠luk age̠ ma̠a̠, E̠mu̠gh E̠tu̠tu̠ bho̠ a̠rileghom A̠zizo̠s ma̠ obhin ib̠eb̠i asu̠gbagba oruom ronyigoiny (A̠luk 4:18), sa̠ asu̠gbagba bho̠ imuzo na̠ okpon igbirigbir ya̠ igboloma̠ ma̠ a̠nwunom ya̠ a̠d̠ien kerekere i̠kparama ado̠l i̠te̠i̠. O̠mar o̠ge̠ omutiom ezin ola̠ o̠tu̠n obo ibo d̠a̠ a̠d̠ire ta̠ A̠luk, okunukun d̠a̠ ri̠pu̠r aru̠mu̠ asu̠gbagba bho̠ ya̠ i̠gba igboloma̠ ma̠ eruoma̠ ta̠ A̠zizo̠s bho̠, na̠ d̠a̠ okunugiom bho̠, ma̠ igiel wa̠ i̠na a̠bhun d̠a̠ ote̠nai̠ny bho̠. Onin o̠ge̠d̠ire onon agba a̠mutiom d̠a̠ a̠d̠ire Rogir Ogbo Ogir bho̠ ma̠ agu̠o̠ ologi-ima̠ra̠ ogbo atu̠ghan ta̠ Akrai̠st a̠bhin asu̠, sa̠ asi̠saragi̠an d̠a̠ ed̠ia̠man ta̠ A̠zizo̠s. I̠wal re̠kal od̠i ma̠ agu̠o̠ u̠ge̠ bho̠ (d̠a̠ E̠mu̠ 1 ka̠ o̠te̠i̠ d̠a̠ E̠mu̠ 2, na̠ d̠a̠ E̠mu̠ 9 ka̠ o̠te̠i̠ d̠a̠ E̠mu̠ 19) ma̠ i̠di̠ar ya̠ ta̠ o̠bi̠gh d̠a̠ Ib̠eb̠i Asu̠gbagba i̠nye̠n ku̠ku̠m. I̠nye̠ igboloma̠ ma̠ aso̠r itileduom ta̠ A̠zib̠a̠ bho̠ na̠ a̠ma̠zua̠n rokponom ro̠nana bho̠ d̠a̠ i̠mara ta̠ A̠zizo̠s, na̠ ogir i̠gbara ta̠ A̠zizo̠s d̠a̠ Otu-a̠siseiny bho̠, na̠ ra̠sidogh Ob̠eb̠i O̠ni̠ Asameria̠ bho̠ na̠ Obhebhia̠n O̠nyi̠ bho̠. O̠ge̠ o̠kparame̠ni̠ d̠a̠ eb̠la̠ ib̠eb̠i asu̠gbagba i̠nye̠n ma̠ agu̠o̠ a̠siseiny, na̠ E̠mu̠gh E̠tu̠tu̠ bho̠ ilei abar i̠te̠i̠, na̠ ogir ya̠ anwani̠ igir d̠a̠ erile-a̠duom ta̠ A̠zizo̠s, na̠ agu̠o̠ A̠zib̠a̠ na̠ awe̠le̠man i̠karabh na̠ a̠nigha̠ ma̠ o̠ni̠.

Aru̠mu̠ i̠di̠ar ya̠ u̠ge̠ bho̠

Otighom

I̠mara na̠ igiel i̠gbara ta̠ Azo̠n Owurmamu̠m na̠ A̠zizo̠s

Erile-a̠duom ta̠ Azo̠n Owurma̠mu̠m bho̠

Owura̠ amu̠m na̠ ad̠agi̠an ya̠ u̠d̠agi̠an A̠zizo̠s bho̠

A̠zizo̠s a̠rile ma̠ erile-a̠duom d̠o̠yo̠ a̠mutiom e̠ma d̠a̠ Agalili

Ob̠eton d̠a̠ Agalili ka̠ o̠te̠i̠ d̠a̠ A̠zeruse̠le̠m

Esi-a̠d̠a̠ma̠ wekunuguma̠ bho̠ d̠a̠ aka A̠zeruse̠le̠m

Ob̠etina̠ d̠a̠ Omugh, imutuma̠, na̠ obhun d̠a̠ ote̠nai̠ny ta̠ Wa̠nwuna̠ bho̠