Thaburi 91

Ngai Nĩwe Mũgitĩri Witũ

1Mũndũ ũrĩa ũikaraga agitĩirwo nĩ Ũrĩa-ũrĩ-Igũrũ-Mũno

arĩhurũkaga kĩĩruru-inĩ kĩa Mwene-Hinya-Wothe.

2Ngũkiuga ũhoro wa Jehova atĩrĩ,

“Wee nĩwe rĩũrĩro rĩakwa na kĩirigo gĩakwa kĩrĩ hinya,

nĩwe Ngai wakwa, ũrĩa ndĩĩhokete.”

3Ti-itherũ nĩegũgũteithũra gĩkerenge-inĩ kĩa mũtegi,

o na kuuma mũrimũ-inĩ ũrĩa mũũru wa kũũraga.

4Arĩkũhumbagĩra na njoya ciake,

na rungu rwa mathagu make nĩho ũrĩĩgitagia;

wĩhokeku wake nĩũgatuĩka ngo yaku na kĩĩhitho gĩaku.

5Ndũrĩĩtigagĩra imakania cia ũtukũ,

kana mũguĩ ũrĩa ũthĩrĩrĩkaga mũthenya,

6o na kana mũrimũ ũrĩa ũceemaga nduma-inĩ,

kana mũthiro ũrĩa ũniinanaga mũthenya gatagatĩ.

7Andũ ngiri no magũe mwena waku,

nao ngiri ikũmi magũe guoko-inĩ gwaku kwa ũrĩo,

no ndũngĩkuhĩrĩrio nĩguo.

8Wee no kwĩrorera ũkerorera na maitho maku

wĩonere iherithia rĩa andũ arĩa aaganu.

9Ũngĩtua Ũrĩa-ũrĩ-Igũrũ-Mũno gĩikaro gĩaku,

o we Jehova, ũrĩa arĩ we rĩũrĩro rĩakwa,

10hĩndĩ ĩyo gũtirĩ ũũru ũgaagũkorerera,

gũtirĩ mwanangĩko ũgaakuhĩrĩria hema yaku.

11Nĩgũkorwo nĩagaatha araika ake nĩ ũndũ waku,

makũgitagĩre mĩthiĩre-inĩ yaku yothe;

12nĩmagakuoya na igũrũ na moko mao

nĩgeetha ndũkaringwo kũgũrũ nĩ ihiga.

13Nĩũgakinyĩrĩria mũrũũthi, o na nduĩra;

ũkarangĩrĩria mũrũũthi ũrĩa mũnene, o na nyoka.

14Jehova ekuuga atĩrĩ, “Kuona atĩ nĩanyendete,

nĩngamũhatũra hatĩka-inĩ;

nĩndĩrĩmũgitagĩra, nĩgũkorwo nĩamenyete rĩĩtwa rĩakwa.

15Arĩngayagĩra, na niĩ ngamwĩtĩka;

ndĩrĩkoragwo hamwe nake hĩndĩ ya thĩĩna,

ndĩrĩmũteithũraga na ngamũtĩĩithia.

16Ngũmũtũũria muoyo matukũ maingĩ nginya aiganie,

na ndĩmuonagie ũhonokio wakwa.”