Thaburi 74

Gũthaithanĩrĩra Bũrũri Hĩndĩ ya Thĩĩna

Thaburi ya Asafu

1Wee Ngai-rĩ, nĩ kĩĩ gĩtũmĩte ũtũtiganĩrie nginya tene?

Nĩ kĩĩ gĩtũmaga marakara maku macine ngʼondu cia rũũru rwaku?

2Ririkana andũ arĩa wegũrĩire o tene,

arĩa wakũũrire magĩtuĩka mũhĩrĩga ũrĩa wegaĩire,

na ũririkane Kĩrĩma gĩa Zayuni, o kũrĩa watũũrĩte.

3Erekeria makinya maku kũrĩ mwanangĩko ũyũ ũtũũrĩte kuo,

wone ũrĩa handũ harĩa haku haamũre hathũkangĩtio nĩ thũ.

4Amuku aku mararamĩire harĩa wacemanĩirie na ithuĩ;

maahaandire bendera ciao irĩ imenyithia.

5Metuĩte ta andũ mekũhiũria mathanwa

mateme mĩtĩ ya mũtitũ.

6Mbaũ iria ciothe ciagemetio magĩciunanga

na mathanwa na ibũi ciao.

7Nĩmacinire handũ-haku-harĩa-haamũre hakĩmomoka,

magĩthaahia gĩikaro kĩa Rĩĩtwa rĩaku.

8Moigire atĩrĩ na ngoro ciao, “Tũkũmahehenja mathire!”

Maacinire handũ harĩa hothe Mũrungu aahooyagĩrwo kũu bũrũri-inĩ.

9Gũtirĩ ciama tũringagĩrwo mahinda maya;

anabii nĩmathirĩte,

na gũtirĩ witũ ũũĩ nĩ nginya rĩ gũgũikara ũguo.

10Wee Ngai, thũ ĩgũtũũra ĩgũthirĩkagia nginya rĩ?

Mũmuku no atũũre acambagia rĩĩtwa rĩaku nginya tene?

11Nĩ kĩĩ gĩtũmĩte ũthune guoko gwaku, o guoko kũu gwaku kwa ũrĩo?

Kũrute mĩkũnjo-inĩ ya nguo ciaku ũmaniine!

12No rĩrĩ, Wee Ngai, nĩwe mũthamaki wakwa kuuma tene;

nĩwĩkaga maũndũ ma kũhonokania gũkũ thĩ.

13Wee-rĩ, nĩwe wagayanirie iria na ũhoti waku,

ũkĩhehenja mĩtwe ya nyamũ iria nene kũu maaĩ-inĩ.

14Wee-rĩ, nĩwe wahehenjire mĩtwe ya Leviathani,

ũkĩmĩheana ĩtuĩke irio cia ciũmbe cia werũ-inĩ.

15Wee-rĩ, nĩwe watũmire ithima itherũke na tũrũũĩ tũtherere,

ũkĩhũithia njũũĩ iria itahũaga.

16Mũthenya nĩ waku o na ũtukũ no waku;

Wee nĩwe wahaandire riũa na mweri.

17Wee-rĩ, nĩwe wekĩrire mĩhaka yothe ya thĩ;

nĩwe watũmire kũgĩe hĩndĩ ya riũa na hĩndĩ ya heho.

18Ririkana ũrĩa thũ ĩkũnyũrũrĩtie, Wee Jehova,

na ũrĩa andũ arĩa akĩĩgu macambĩtie rĩĩtwa rĩaku.

19Ndũkaneane muoyo wa ndirahũgĩ yaku kũrĩ nyamũ cia gĩthaka;

ndũkariganĩrwo nĩ mĩoyo ya andũ aku arĩa manyariirĩtwo nginya tene.

20Ririkana kĩrĩkanĩro gĩaku,

tondũ kũndũ guothe kũrĩa kũrĩ nduma bũrũri-inĩ kũiyũrĩte haaro.

21Ndũkareke mũndũ ũrĩa mũhinyĩrĩrie acooke na thuutha aconokete;

andũ arĩa athĩĩni na arĩa abatari nĩmagooce rĩĩtwa rĩaku.

22Arahũka, Wee Ngai, ũrũgamĩrĩre kĩhooto gĩaku;

ririkana ũrĩa andũ arĩa akĩĩgu magũthirĩkagia mũthenya wothe.

23Ndũkariganĩrwo nĩ mbugĩrĩrio ya amuku aku,

o inegene rĩa thũ ciaku, rĩrĩa iranegena itegũtigithĩria.