Wer Mamit 8

1Ka dine ibedna owadwa mahie,

mane wadhodhogo thuno achiel,

to dine anyodhi, kapo ni ayudi oko,

kendo onge ngʼama dine ochaya.

2Dine amako badi, mi akeli nyaka

e od minwa kama ne opuonjae.

Dine amiyi divai moketie yedhe madungʼ tik mamit mondo imadhi;

kendo dine amiyi olemo mongʼinore makwar.

3Bade ma koracham oteno wiya,

to bade ma korachwich okwaka.

4Un nyi Jerusalem, asiemou ni kik

utug hera kata chiewe ka sa ne pok oromo.

Osiepe

5Mano to ngʼa mabiro koa e piny motimo ongoro

koyiengore kuom jaherane?

Nyako

Ne achiewe e bwo yadh olemo mayom;

kanyo ema ne minu omake ichni,

kendo kanyo ema ngʼat mane muoch okayo nonywolie.

6Para e chunyi kinde duto,

kendo wiyi kik wil koda;

nikech hera nigi teko mana ka tho, kendo nyiego ma

hera nigo tut mana ka bur tho.

Herano liel ka mach mabebni,

kendo mana ka ligek mach maduongʼ.

7Pige mathoth ok nyal nego hera;

kendo kata aore maringo ok nyal ywere.

Ka dipo ni ngʼato dichiw mwandu duto mag ode

mondo oyud hera, to mano dibed fuwo maduongʼ.

Osiepe

8Wan gi nyaminwa moro matin,

kendo thundene pok obedo madongo.

Angʼo mwanyalo timone

nyaminwa chiengʼ ma wuowi obiro dware?

9Ka dine bed ni en ohinga,

to dine wagero osuch fedha kuome.

To ka dine obed ni en dhoot,

to dine walore gi thigo mar bap sida.

Nyako

10An to an ohinga,

kendo thundena ochungʼ,

ka ohinga moger motingʼore gi malo.

Kuom mano, asebedone wangʼ monenogo,

kendo asemiyo obedo gi kwe.

11Solomon ne nigi puoth

mzabibu kama iluongo ni Baal Hamon;

kendo ne oketo puotheno e lwet jopur.

Moro ka moro kuomgi nonego chul Solomon kilo,

apar gachiel gi nus mar fedha kuom olembene.

12An to an gi puotha awuon mar mzabibu;

to in Solomon in to bed abeda gi kilo apar gachiel,

gi nusgo miyudo kuom jopur,

to un jopur un bende beduru abeda gi kilo,

ariyo gi nusgo moyudo kuom poku.

Wuowi

13In midak e puothe mzabibu

kaachiel gi osiepeni mabudhi,

yie awinjie dwondi gie puodho kuno!

Nyako

14Bi wadhi, jaherana,

kendo chal gi mwanda kata le,

mamoko manie thim mochungʼ

ewi gode mopongʼ gi yedhe madungʼ tik mangʼwe ngʼar.