Biblica® Ochiw Thuolo Motingʼo Loko Manyien™
Wer Mamit 1
Tap a verse to save, highlight, add a note or share it.
Wer mamit moloyo wende moko nondiki gi ruoth Solomon.
Nyako
Bi mondo inyodha gi dhogi,
nikech herani kelo mor moloyo divai.
Modhi miwirorigo dungʼ mamit;
kendo nyingi chalo gi mo mangʼwe ngʼar ma pukore oko.
Kare mano emomiyo nyiri duto oheri!
Kawa idhi koda, waret piyo waa kae!
Ruoth mondo odhi koda nyaka ei ode maiye.
Osiepe
Wail kendo chunywa mor kodi;
wabiro pako herani moloyo divai.
Nyako
Gitimo gima kare ka gipuoyi!
An nyako ma dichol kendo ma jaber,
yaye nyi Jerusalem,
an dichol mana ka hembe mag Kedar,
kendo mana ka pasia molier e hembe Solomon.
Kik uchaya nikech an dichol,
nimar chiengʼ ema oseloko denda kamano.
Yawuot minwa nokecho koda,
mine giketa jarit puothegi mag mzabibu;
to puotha awuon mar mzabibu to ne ajwangʼo.
Yaye jaherana, nyisane kuma ikwayoe jambi
kod kuma iweye rombi mondo oyweyee odiechiengʼ tir.
Angʼo momiyo dachal mana gi dhako moumo wangʼe
e dier jamb osiepeni?
Osiepe
Ka ok ingʼeyo, yaye jaber moloyo mon mamoko,
lu bangʼ rombe kuonde ma gikwayoe,
mondo ikwa nyidiek ma pod tindo
e bath hembe mag jokwath.
Wuowi
Jaherana, apimi mana gi faras madhako
motwe but achiel kuom geche Farao.
Lembi nenore maber ka sitadi olierie;
ngʼuti bende nenore maber ka olierie tigo ma nengogi tek.
Wabiro losoni thiwni mag dhahabu,
kod tigo mag fedha.
Nyako
Kane ruoth chiemo e mesane,
mo mangʼwe ngʼar man-gi tik mamit nopongʼo ot kadonjo.
Jaherana chalona gi mo mane-mane mobo matin ma nengone tek,
mantie e kind thundena.
Jaherana chalona maua maber mothiewo,
moa e puoth mzabibu man En Gedi.
Wuowi
Mano kaka ijaber, jaherana!
Yaye, mano kaka ijaber!
Wengeni neno mamuol ka akuru.
Nyako
Mano kaka iber, jaherana!
Yaye, mano kaka berni olomba!
Kendo kitandawa bende yom ka lum mangʼich.
Wuowi
Bepe mag tat odwa gin mag sida;
kendo bede yien mokar mag obudo nobednwa tado.
Biblica® Open New Luo Translation™ / Biblica® Ochiw Thuolo Motingʼo Loko Manyien™. Copyright © 1980, 2002, 2003, 2020 by Biblica, Inc. Used with permission. “Biblica” is a trademark registered in the United States Patent and Trademark Office by Biblica, Inc. Used with permission. Original work available for free at www.biblica.com and open.bible. CC BY-SA 4.0. Typesetting only; no intended changes to scripture wording. BibleKenya is not endorsed by Biblica.
Full source notice & licence · CC BY-SA 4.0 · SourceEdition imported 2026-10-25.